Ta masha tristo ora bo pasa banda di un cas y tende un pareha casa ta pleita cu otro tocante di e cen cu mi a fia bo te ainda bo no por paga mi.( Pero nos tur sa cu Bijbel ta siña nos cu e homber lo bandona cas di su mama y su tata y uni cu su esposa y nan dos lo bira un carni.
Esey ta nifica cu entre un pareha casa cu stima otro no por tin fiamento di placa pasobra tur cos ta wordo haci hunto.(Genesis 2:24).
Mas doloroso ta ora bo tende un yiu ta para pafo di cas, y grita na bos halto na mama,bisando”Puntra tata ki dia mi ta haña mi placa, pasobra ma fia tata awor tata ta tarda pa paga, of e a lubida. Y e yiu ta falta e tata respet pa motibo di placa.
Muchanan cu ta discuti cu nan mayornan pasobra nan kier bay scol cu cierto Keds di marca y nan mayornan no por afford di cumpra, y asina ta bini discordia entre mayor y yiu.
Materialismo bao di mucha ta demostra inmediatamente e educacion cu e mucha a ricibi di su mayornan.
Nos no tin nada contra cu siña mucha spaar for di chikito, pero mester tene masha cuidao cu placa no bira nan Dios for di chikito.
Materialismo ta e causa cu awor aki nos tin hobennan cu ta bende nan curpa, pa yega na cosnan , manera telefon, paña y sapato di marca, placa pa haci Tatto, placa pa droga, etc.
Hopi adulterio ta cuminsa pa motibo di materialismo, ora un hende su curason ta desea un cos cu su pareha no ta financieramente cla pe , y e ta bay buske serca otro persona a cambio di fabor sexual.
Den 2 Timoteo 3:1-9 e bijbel ta splica nos con e tempo lo ta trabahoso y con materialismo lo avansa pasobra hende lo bira mas stimado di nan mes cu di Dios, y e amor pa placa lo crece , cu hende ta lubida riba etica, moral, y respet.
Materialismo ta aumenta criminalidad, pasobra hende ta perde amor pa prohimo, y tambe perde temor pa Dios, y ta drenta den un bida scur, den cual no tin ningun clase amor pa e bida di ser humano, pesey nos ta mira cuanto hende ta wordo likida pa motibo di placa.
Materialismo ta destrui bida Spiritual ( Revelacion 3:17-18).
Materialismo ta haci hende ciego pa rikesa. ( Marco 10:23-25).
Materialismo ta trece ansiedad ( Mateo 6:25-34).
Materialismo ta haci hende orguyoso. ( Proverbionan 30:7-8-9).
Materialismo ta trece inmoralidad y deteriora famia ( 2 Samuel capitulo11.)
Materialismo ta stroba proposito di Dios.( Mateo 13:22).
No stima mundo y e cosnan di mundo, si un hende t stima mundo, e amor di e Tata no ta den dje. Pasobra tur loke cu tin den mundo, e deseo di carni,y e deseo di wowo, y e orguyo di bida,no ta bin di e Tata, sino di e mundo. E mundo ta pasa bay y su deseonan tambe, ma esun cu ta haci e boluntad di Dios ta permanece pa semper.(1 Juan 2:15-17).
Amistad cu mundo ta enemistad cu Dios. Pesey ken cu kier ta amigo di mundo ta haci su mes enemigo di Dios.( Santiago 4:4).
Laga boso karakter ta liber di amor pa placa, y sea contento cu loke boso tin: Pasobra E mes abisa: nunca lo mi bandona bo y nunca lo mi laga bo desampara. (Hebreonan 13:5)
Materialismo ta trece ruina den matrimonio y famia.
Sinceramente, Pastor Marcel Balootje
