Tin hopi famia ta wordo destrui, pa motibo di droga y alcohol. inmoralidad, adulterio, paranda, y hopi malicia.
Pregunta ta wordo haci, na unda e respet pa matrimonio y famia a keda?
Si un hende tin un bunita famia y e ta ripara cu su bebemento ta locual ta trece problema, un persona cu sano huicio lo scohe pa su famia, y no sigi bebe y perde tur cos.
Bo ta kere ta posibel un homber ta casa, busca un hypotheek hunto cu su esposa, traha un cas bunita, forma un famia, y despues laga alcohol y droga destrui tur cos?
Bo ta kere ta posibel un muher y un homber ta casa y forma nan bida, y nan tin nan yiunan, y diripiente un chick jong ta aparece of un guy jong Ta aparece, y kibra un matrimonio manera nada no a pasa?
Ta tempo pa hende sinja balora nan matrimonio y famia, pasobra e cifra di divorcio ta subiendo keto bay y e motibonan ta varia hopi, y e pregunta ta bini na unda respet pa matrimonio y famia a keda?
Tin trend tambe cu ta pasando den hopi pareha casa cu nan no tin respet ni tampoco intimidad entre nan dos , tur cos nan ta papia pa tur hende sa con nan relacion intimo ta.
Tene bon nan cuenta cu esun cu ta papia malo di su esposa of esposo ta papia malo di su mes.
Awor pa drecha cos den matrimonio y famia , mester yega na e acuerdo pa pone Dios na prome lugar.
Pasobra e palabra di Dios ta bisa: Esposonan stima boso esposa, mescos cu Cristo tambe a stima e iglesia y a entrega Su mes pe.( Efesionan 5:25).
Ma mescos cu e iglesia ta sumiso na Cristo , asina tambe e esposanan mester ta sumiso na nan esposo den tur cos.( Efesionan 5:24).
Y laga nos tene bon cuenta cu esaki:
Sinembargo den Senjor ni muhe, no ta independiente di homber, ni homber no ta independiente di muher.Pasobra mescos cu muher ta origina for di homber,asina tambe homber ta naci di muher,y tur cos ta origina di Dios. ( 1 Corintionan 11:11).
Pesey den un matrimonio y famia Dios mester ta na prome lugar , pasobra homber y muher mester ta someti na Senjor, pasobra si no ta asina e enemigo cada rato ta drenta y haci fiesta den cas y trece tardansa den cas, den tur cos, hasta den educacion di yiunan, cu ta mira tur dia cu e relacion entre mama y papa no ta bay bon.
Imagina bo, cada rato mester warda ora e muher tin bon beis, of e homber tin bon beis pa papia, mientras e enemigo ta horta, mata y destrui.
Cuanto biaha un hoben no tin un problema, pero e tin cu warda beis di su mayornan drecha pa asina e por purba na splica kico e ta pasando aden.
Cuanto biaha den un famia cosnan ta pasa pero pa falta di comunicacion e cosnan ta resulta den man di hende contrali cu no por yuda cu nada.
Ma mi kier pa boso compronde, Cu Cristo ta cabes di tur homber,y e homber ta e cabes di e muher, y Dios ta cabes di Cristo.( 1 Corintionan 11:3).
Tin un urgencia pa matrimonio y famia , wordo restaura,pasobra cada matrimonio y famia cu no ta funciona manera,mester ta, ta un sla den nos sociedad, pasobra esun cu mas ta sali perhudica ta e muchanan cu hopi biaha ta keda cu trauma.
Nos ta roga na Dios pa pone Su man den e asunto aki.
Sinceramente, Pastor Marcel Balootje
