Mayan mainta, Bryan Jimenez (28) y Jennifer Gonzalez (39) tin cu presenta dilanti Hues pa scucha nan sentencia. Fiscal ta haya ambos culpabel di asesinato di e miembro di CEA, Sergio Maduro riba 24 December 2023.
SOLO DI PUEBLO por a compronde cu Fiscal a exigi 18 aña di prison pa Bryan y 20 aña di prison pa Jennifer.
SCUCHA ACUSADO PAPIA
Dia 6 di September 2024, tratamento di e caso a tuma lugar caminda Fiscal a bisa Hues cu e pareha aki ta envolvi den e asesinato cruel di Sergio. Recherche a logra detene e homber P., door cu e tabatin e chip di e cellular di Sergio den su cellular. Den interogacion, P. a basha abao riba Bryan.
Recherche a pone mike special den auto di Bryan pa scucha combersacion entre e homber P. y Bryan. P. ta esun cu a bay busca Bryan na Noord, despues cu Bryan a mata Sergio Maduro banda di e parke di Avestruz.
ASESINATO PREMEDITA
Fiscal ta haya tur esaki ta un asesinato premedita. El a bisa cu tabatin un plan caminda mester a laga mustra cu ta un accidente a sosode y cu Sergio a fayece. A haya DNA di Bryan bou huña di Sergio cu ta mustra cu e rascanan cu Bryan tabatin na su braza ta di Sergio cu tabata lucha pa su bida. Despues di a asesina Sergio, Bryan a bay para e auto di Sergio banda di un school na Noord. Fiscal a mustra cu Bryan a bisa tur cos con Jennifer a pidi pa asesina Sergio y door cu Bryan tabatin mester di placa pa paga alimentacion di su yiu na Hulanda, el a pidi 2 mil florin.
Fiscal ta haya cu Jennifer ta gaña di no a haci nada y tira tur culpa riba Bryan. Fiscal a bisa cu tin testigo a mira Bryan y Jennifer den auto riba 24 December 2023. Fiscal a mustra cu tin hende a bisa cu Sergio a bisa cu Jennifer ta blo mira peliculanan di asesinato na television y ta kere cu Jennifer kier laga mat’e. Fiscal a sigui bisa cu tin diferente hende a bisa cu Jennifer a bisa cu e ta fada di Sergio y cu e kier mat’e. Na opinion di Fiscal, Jennifer no a laga esaki na papia so sino a haci’e tambe door di pidi Bryan, kende a asesina Sergio na un forma cruel. El a sigui bisa cu Jimenez y Jennifer a bay check si tin placa riba cuenta di Sergio via ATM pero no a haya nada. Fiscal a mustra cu Jennifer ta keda desmenti di a planea e asesinato di Sergio pero tur e otro testigonan y hasta e sospechoso Bryan ta mustra cu Jennifer ta envolvi.
Fiscal a exigi 18 aña di prison pa Bryan y 20 aña di prison pa Jennifer.
Mayan lo haya sa kico Hues ta pensa di e caso y ki castigo e lo condena e pareha aki.
