Un mucha ta lanta y mira tur locual su mayor ta haci y riba esey e ta forma base pa su bida, pasobra su mayor ta esun cu ta mas serca di dje, esun cu ta mas pega cune, cual ta facil pa e copia.
Si e mayor ta haciendo locual ta corecto, e mucha tambe ta haci locual ta corecto, pero si e mayor ta haci cosnan incorecto e mucha tambe lo lanta ta haci cosnan incorecto.
E asunto aki ta asina facil cu tur hende mester comoronde.
Un fenomeno cu nos tin ta hopi biaha ta cu mucha ta duna lus na mucha, cual ta un situacion cu un hoben ta sali na estado, mientras e mes no a madura ainda, y no tin suficiente experiencia di bida, ni tampoco a ricibi suficiente educacion serca su mayornan, e ora ey ta bira dificil pa e duna algo na su yiu, cu e mes no a ricibi.
Nos tin para keto un rato, y wak bon den cual direccion nos ta dirigi nos yuinan, cual ehempel ta wordo duna, y especialmente, cual unfluencia ta drentando bida di nos yuinan.
Pesey nos tin di tene cuenta , si nos ta dunando bon ehempel, displina, coreccion , pa asina e mucha por bira un bon cuidadano mayan cu Dios kier.
Den tempo cu nos ta bibando awor aki, esey no ta facil, hasta muchanan cu ta lanta den cas cu tur dos nan mayornan, mester di mas atencion, pasobra e tempo ta trabahoso.
E falta di respet cu ta reinando, e desobediencia cu ta creciendo, e aumento di inmoralidad, violencia, impuresa, y criminalidad, ta mustra cu como mayor extra atencion mester wordo poni riba comportacion di nos yiunan.
E conducta di un mucha, ta demostra for di cual cas e ta bini, pasobra educacion ta cuminsa na cas, si na cas cos no ta bon, ningun otro caminda cos no ta ta bon.
Tur mayor tin un encargo di Dios pa lanta nan yuinan ( Efesionan 6:4). Cual mester wordo cumpli cune pa evita tur clase di problema pa e mayor mes, y pa e comunidad.
Mayor no por djis habri man laga bay y bisa mi no por mas cune, e no ta tende,e ta haci manera e kier, no esey no ta posibel, aunke e ta pasando cu frecuencia, pasobra ora e tabata chikito e a wordo malcria, y e mucha no a wordo instrui den e palabra di Dios, pa asina por lanta cu un disiplina corecto.
E asunto di lanta yiu den e bon caminda a bay hopi for di man, parce cu hopi mayor ta kere cu tur locual ta digital ta parti di educacion di nan yiu, y mas cos digital e mucha tin mihor e ta wordo educa.
Pero hopi ta lubida riba e amor di mayor , cu no por wordo reemplasa cu nada, amor di mayor ta keda amor di mayor, e tempo di mayor inverti na chikito, lo keda semper demostra den bida di e mucha.
Placa, bistimento, joyas, no ta educacion, pasobra si no tin bon educacion, no tin balor di bida, y esey ta algo cu hopi hoben no tin awendia, locual ta balor di bida, locual ta decensia, respet pa nan mes y pa otronan.
Un hende husto ta cana den su integridad, ki bendiciona su yiunan ta despues di dje. ( Proverbionan 20:7).
Ta depende con mayor ta lanta su yiu, y con su yiu lo comporta, no tuma esaki como un critica, pero tume como un aviso,pasobra e ta simplemente berdad.
Sinceramente, Pastor Marcel Balootje
