Ta deber di tur mayor, pa cria nan yiu, nan mester provee cas,cuminda,panja,etc, pasobra esey ta locual tur mucha tin derecho riba dje.
Ora nos papia di sostene, nos no kier men Telefon,tablet, laptop,pero tin hopi manera cu un mayor tin cu sostene su yiu pa e lanta un persona util pa comunidad y no un molester den comunidad.pasobra esaki ta un realidad grandi cu nos ta mira ta sosode tur dia y nos ta puntra na unda e mayor ta, kico nan a haci?
Den naturalesa ora bo planta un mata, ta bo deseo pa e crece stret y no manera un mata di kwihi, cu ta crece segun e biento cu ta zwaai e mata, tur desforma, cu raisnan zwaak cu ora awacero cay duro y biento supla duro e ta cay pasobra su raisnan ta hopi superficial.
Awel mescos un mucha mester wordo sostene cu raisnan fuerte di educacion, pasobra educacion ta cuminsa na cas, y tur mayor ta responsabel pa un bon educacion di nan yiu.
Corda bon cu sosten pa bo yiu, no ta nifica e keds di ultimo modelo, pa competi cu otro, pasobra cosnan material, no ta parti di educacion, pasobra hopi hende ta kere cu si un mucha costumbra cu cosnan di marca for di chikito, e ta lanta un mucha, cu sa kico e kier.
Y hopi biaha eynan malcriansa ta cuminsa, pasobra un mucha mester lanta cu locual su mayornan por dune, pa e sa cu bida, nos tin cu biba trankil, no forsando pa competi cu otro hende, pero conforma cu locual bo tin y no bira egoista.
Ora nos sostene nos yiu den e forma ey, nos ta lanta un mucha sano, cu ta biba segun e budget cu su mayornan tin, y ningun mayor mester traha dos trabao, cu nan no tin tempo pa sirbi Dios, pasobra nan ta ocupa den preocupacion di bida ( Lucas 21:34). Pasobra tin hende ta traha dos trabao pa necesidad, pero tin otro ta traha dos trabao, pa luho, pasobra asina nan ta pensa cu tin mas cen den saco.
Un pregunta ta surgi: Kico lo a pasa si awor aki cu tur cos a bira caro, y cu hende ta demostra di stima placa mas cu Dios, y no tin oportunidad pa traha dos trabao?
Ki bale la pena traha dos trabao y perde famia, perde yuinan, pasobra nan no tin bo sosten, pasobra ora bo no ta na trabao bo ta den Gym, y awor aki den tempo di carnaval, mayor ta sali for di trabao directa mente y bay traha riba su piece y yuinan ta nan so na cas.
Yuinan mester wordo sostene, cu tempo , amor, carinjo, respet, coreccion, disiplina y mas cu tur cos pa sinja nan e Palabra di Dios, y con pa biba un bida cu ta agrada Senjor.
Ora bo planta un mata y bo no dune sosten e ta crece bay den e direccion contrali y hopi biaha e ta dobla cu ta resulta dificil, pa stret e palo bek, awel asina ta un yiu cu lanta sin sosten berdadero di su mayor, pasobra no ta sosten financiero, cuminda y cas so ta conta, pero e sosten di decencia, ordo y respet ta primordial den bida di tur hoben, pasobra si un mucha no sinja respeta na cas, e no ta respeta hende ningun otro caminda, asina e ta bira un mucha asocial, cu tur caminda cu e yega su actitud y vocabulario ta spanta hende.
Mayor bo sosten pa bo yiu ta un mandato di Dios, ta bo deber.
Sinceramente, Pastor Marcel Balootje
