Awendia tur cos ta bini cu un manual, antes si bo cumpra un cashi, e muebleria ta manda un truck cu varios hende riba dje pa asina carga e cashi y pone safe den bo cas, y tene bon cuenta cu e spiel no kibra, pasobra esey ta e servicio cu nan por duna bo, pa bo cashi yega bon den bo cas.
Awendia ta un caha bo ta hanja cu bo cashi aden, y hasta nan ta cobra pa arma e cashi, of bo mes tin cu hacie, asina nos por wak cu tur cos ta bini cu su manual.
Auto, truck, etc tur cos tin su manual, pa asina bo sigi e manual pa un bon funcion di e aparato cu bo a cumpra.
Pero que hubo di nos yuinan, ora nan ta den barica di mama, nan no ta nace cu un manual con nan mester wordo cria, pero a base di amor , bon cuido, respet, disiplina, coreccion, hygiena, bon cuminda, drumi na tempo, nos tin cu pone un yiu riba pia pa e ta un bendicion pa nos mes, na prome lugar, y un bendicion pa comunidad.
Nos ta cuida e mucha na chikito bon,pa e no cay for di nos man, tin mama ta carga e mucha henter dia pasobra nan stima e mucha asina tanto, cu nan no kier pone den cama, pasobra nan kier pone tur atencion na e baby.
E mes un amor ey mester permanece segun e mucha ta creciendo, pasobra e manual di bida di e mucha ta den man di su mayor, y si bo no tabata sa, esey ta algo cu Dios a confia bo cune, esey ta algo cu abo tin di duna cuenta na Dios kico abo como mayor a haci cune.
Locual bo pone den bida di un mucha, of locual bo sembra den bida di un mucha, esey ta e fruta cu lo sali for di e mucha, y abo como mayor ta esey bo ta bay cosecha.
Bijbel ta bisa den Proverbionan 22:6 : Instrui un mucha den e caminda cu e mester cana,y hasta ora e bira bieu , e lo no aparta su mes for di dje.
Awor e instruccion ta wordo confia den man di e mayor, no den man di tv, ni tampoco di internet, no den man di facebook, tampoco whatsup, no den man di hende cu no ta responsabel pa e mucha , pero den man di su tata y su mama, pasobra ta nan dos a uni sexualmente pa asina e mucha a yega na mundo.
Aki nan no tin asunto di cuminsa cu algo, y lage na mitar, no ta cuenta cu ora e cos bira pisa, un ta corre bay laga e otro cu tur e responsabilidad, pero mester keda hunto, lanta e mucha bon, pasobra e responsabilidad di bida pa un mucha ta su mayornan.
Hopi biaha un mama soltero ta lanta un yiu bon, door cu e mes a wordo lanta bon lanta den su cas, y locual e a ricibi e a pasa over pa su yiu cu hopi amor, pero tambe nos a bin ta nota cu hopi no ta logra esey.
Pero nos tin cu corda tur mayor cu educacion ta cuminsa na cas, y na cas ta mayor tin e manual, y purba lanta un mucha sin Dios, den su bida, ta un mal movecion den e bida di e mucha. Pasobra palabra di Dios ta bisa den Efesionan 6:4 : Lanta bo yiu den e disiplina y instruccion di Senjor.
Sinceramente, Pastor Marcel Balootje
