No tin miho, mentor, tampoco educador, esun cu tin cu coregi y disiplina, esun cu tin cu stima,esun cu mester guia den bida di un mucha cu su propio mayor.
Den tur momento e mayor mester ta activamente envolvi den bida di su yiu, y mas cu tur cos visibel, laga tur hende sa cu bo tey, pasobra bo ta cumpliendo cu un deber sagrado, of mihor bisa un mandato di Dios.
Un mucha laga pa su cuenta awe, esey ta nifica un porta habri pa mal amigo y e enemigo drenta su bida, pa falta di negligencia di su mayor, pasobra di berdad e presencia di mayor ta sumamente necesario den bida di un mucha tur momento di su bida,pero especialmente ora e ta un hoben.
Ban pone Gym, hunja, cabey, auto, paranda, overtime, byside, deporte,alcohol, droga, inmoralidad etc, un banda y ban pone tempo pa nos muchanan, pasobra locual bo falta awe por bira un berguensa mayan,y por yega asina leu cu bo mes como mayor tin cu yora.
Tin hopi mayor ta kere cu internet y scol ta educa nan yiunan, pa nan, pasobra nan ta bisa cu e mucha sa tur cos, pero e mucha no sa nada, pasobra e cos di mas importante cu e mester e no tin , cual ta e amor di su mayor, e hende cu e por aserca cu confiansa, e mentor pa su bida, e caminda cu e por yora, hari y haci pregunta, cual e no por puntra ningun otro henede, y esey ta serca abo so e por hacie cu confiansa.
No laga den man di otro hende locual ta bo deber sagrado, pasobra pesey Dios a scohe abo specificamente, pa ta mayor di bo yiu, pesey ta tristo ora un homber of un muher, no ta tuma su encargo como mayor na serio,pasobra bo tin cu duna cuenta na Dios pa esey.
Awor cu nos ta den vacantie, tene bon cuenta na unda bo ta laga bo yiu, pa bo bay cu vacantie.
Nos mihor conseho ta , pa bo bay cune, y si bo no por bay cune, pasa bo vacantie aki mes, pero no laga bo yiu, serca ningun hende cu bo no conoce bon, djis pa bo tin libertad, un paar di dia, pasobra e asunto aki por pone bo lamenta henter bo bida.
Pasobra awendia maldad ta sconde tur caminda, y e bista di maldad ta dirigi riba muchanan, pa haci nan danjo, y pesey nos como mayor mester ta wowo, habri pa e asunto di laga nos yuinan, bay keda drumi na cas di amigo of amiga.
Pasobra den e tempo trabahoso cu nos ta biba aki, tanto mucha muher , como mucha homber ta corre mesun peliger.
E enemigo no ta respeta, no lubida cu e a bini pa solamente, pa horta, pa mata y pa destrui. ( Juan 10:10).
Instrui e mucha den e caminda cu e mester cana, y hasta ora cu e bira bieu, e lo no aparta su mes for di dje.( Proverbionan 22:6).
Coregi bo yiu, y e lo duna bo trankilidad,si e lo haci bo alma contento.( Proverbionan 29:17).
Un yiu sabi ta haci su tata contento,ma un yiu bobo ta un tristesa pa su mama. ( Proverbionan 10:1).
No solamente un mayor mester supli, cuminda, cas, panja,educacion pa su yuinan, pero tambe e bida spiritual di su yiu ta sumamente importante, un mayor tin e deber di sinja su yiu haci oracion y lesa su bijbel,y pone atencion pa esaki tuma lugar cu frecuencia.
Mayor mester stima su yiu.
Sinceramente, Pastor Marcel Balootje
