Tin hopi cos stranjo ta tumando lugar, malo ta wordo yama bon y bon ta wordo yama malo.
Ta manera inmoralidad kier domina, y hende ta haci manera ta normal pa participa den cos cu ta contra boluntad Dios, y cosnan cu ta causa dolor den nos comunidad.
Ta kico ta pasando hende no ta balora bida mas ?
Hende no ta stima otro mas?
Hende no tin temor di Dios mas?
Hende solamente ta wak un momento di goso carnal y no ta wak consecuencia grave cu ta na caminda.
Uso di droga y alcohol ta cuminsa chikito, pero prome cu hende pensa ta converti den adiccion.
Hende ta chansa cu droga y alcohol, pero droga cu alcohol no ta chansa cu hende,
Droga y alcohol ta simbolo di destruccion, nan tey pa horta , pa mata y pa destrui.
Cuanto hende nos conoce cu a muri pa motibo di overdose di droga, of pa motibo cu alcohol a danja nier, stoma, pulmon y despues causa morto.
Cuanto matrimonio y famia no a wordo destrui pa motibo di droga / alcohol.
Por ta tin hende cu ta bisa cu e marihuana cu nan ta usa, no ta haci nan nada, pero poco poco segun tempo ta bay nan lo mira cu nan a wordo enganja.
Cuanto hende awe no ta drumi riba caya, a perde tur clase di desencia, y respet pa nan mes y pa otronan.
Droga y alcohol no ta respeta clase ni ningun tipo di estudio, tin hende cu ta bon studia, drumiendo den caya , siendo nan tin cas, y famia cu nan por keda serca dje, pero e droga tin nan domina, cu nan no kier acepta realidad di bida.
Bijbel ta identifica droga como puro idolatria, pasobra droga ta pone hende lubida riba Dios, pasobra deseo pa uso di droga ta pone hende bende nan mes, perde cabes. y cay den inmoralidad, y asina degenera.
Awor ta con un hende cu sano huicio por apoya su yiu den uso di droga y alcohol?
Ta con un mayor por complace un yiu, sabiendo cu asina bo ta yude pa yega na destruccion mental,moral, fisico y spiritual.
Mayor ta kico tin di broma, ora bo sa bon, bon cu bo yiu ta usando droga den su camber, y bo no kier stop e hoben, ta cual ta e mal influencia cu ta pone mayor cu yiu ta droga y bebe hunto te ora ta completamente bao di influencia.
Kico a pasa cu etica y moral, acaso hende no ta corda cu mayan tambe tin bida? Hende no ta corda cu mesun cara y curpa cu bo tin awe lo bo tin mayan.
Ta para scirbi hopi cla den tur Bijbel: Boso no sa cu boso ta tempel di Dios, y cu e Spirito di Dios ta biba den boso, Si un hende destrui e tempel di Dios, Dios lo destrui e.( 1 Corintionan 3:16-17). Pasobra tempel di Dios ta santo y esey ta loke boso ta.
Of boso no sa cu boso curpa ta e tempel di Spirito Santo, kende ta den boso. Kende boso tin di Dios, y cu boso no ta pertenece na boso mes ?.Pasobra boso a wordo cumpra pa un preis: Pesey glorifica Dios den boso curpa. ( 1 Corintionan 6 : 19-20).
Ora mayor ta consenti cu su yiu su uso di droga y alcohol, den un palabra bisa e ta consenti cu e mucha su destruccion, y cu mayan pa e tipo di negligencia ey e mucha lo no logra nada den bida.
Sinceramente, Pastor Marcel Balootje
