Mas atencion un mayor pone awendia, pa su yiu, mas bon e ta pa nan tur dos.
Nos no ta bibando den e mihor tempo, no absolutamente, nos ta bibando den tempo trabahoso, caminda cosnan cu ta parce chiki por bira grandi y afecta bida di nos yiu.
Tin asima tanto distracion, malisia, inmoralidad y perversion ta bay rond den bida di muchanan, cu bo ta puntra bo mes, pakico y dicon, pero no lubida cu Hesus a bisa , laga e muchanan bini serca Mi, no stroba nan, pasobra E sa cu e enemigo tambe ta nan tras pa destrui nan.
Nos mester pone atencion special na nos yuinan, y especialmente nos hobennan, y no haci man grandi prome cu tempo. Awendia bo no ta mira strekki den cabey mas cu ta identifica un mucha chiki, mayornan ta pura pa bisti e mucha manera mucha grandi e ta , y asina e tambe ta cuminsa pensa e ta mucha grandi y hopi di nan no ta gosa di nan infancia, door di pensamento grandi cu ta wordo hinca den nan cabes.
Un telefon por cambia bida di un mucha, si e mayor no ta atento den e asunto, pasobra tin mayor ta kere cu nan yiu ta na sonjo,pero e mucha ta riba su telefon y no ta drumi na ora pa e por lanta bay scol.
Corda bon bo tin tur derechi di tuma e telefon for di e mucha, of bise pone e telefon den bo camber y bay su camber, pa asina bo tin control, riba tur locual ta haber cu e telefon anochi, pa evita cu bo tin cu zundra mainta, pa e mucha por lanta, y tambe evita cu e mucha por tin mas atencion pa su telefon, cu e tin atencion pa su desayuno mainta.
Coreccion y disiplina di bo yiu, no tin mester di tin palabra malo y ofensa den dje, simplemente abo como mayor mester pone orden y regla, y no desvia for di nan, pasobra lo bay tin consecuencia pa boso tur dos.
E mucha lo ta malcria, y no kier tende, y abo lo pasa berguensa cune dilanti di hende, si abo como mayor no ta atento cune, pasobra bo atencion por scapa bida di bo yiu ,y bo falta di atencion por pone bo sinti bo mes culpabel, pa hopi tempo, pasobra lo bo bisa, si mi a papia, si mi a wak, si mi a guia, si mi a tuma mi responsabilidad na serio, si mi tabata na cas, awe mi yiu lo ta bon of lo mi tin mi yiu.
Diabel ta gusta pa hende sinti nan mes culpabel, pasobra asina e por traha riba consenshi y salud mental di hende. Pesey e palabra di Dios ta bisa hopi cla;Instrui e mucha den e caminda cu e mester cana,y hasta ora e bira bieu,e lo no aparta su mes for di dje.( Proverbionan 22:6).
Disiplina bo yiu mientras tin speransa ainda, y no desea su morto. ( Proverbionan 19:18).
Y na tur mucha y tur hoben e palabra di Dios ta bisa: Scucha conseho y acepta disiplina. Pa bo por ta sabi pa resto di bo bida.( Proverbionan 19;20).
Y na e mayor e palabra di Dios, ta keda zona tur dia, sea atento: Y boso tatanan, no provoca boso yiunan na rabia, ma lanta nan den e disiplina y instruccion di Senjor.( Efesionan 6:4).
Haci tur esfuerso pa bo lanta bo yiu, miho cu bo mayor a lanta bo, e tempo cu nos ta bibando aden no ta tempor di haci wega. Corda riba Juan 10:10 tur momento.
Sinceramente, Pastor Marcel Balootje
