Gracias na Dios, orkaan Melissa , ni ningun otro tormenta tropical no a haci danjo na nos isla. Ya e temporada di orkaan ta bay terminando, ta poco awacero e isla aki mester.
Pero locual droga, alcohol, imoralidad, perversidad y malisia ta haci cu nos hubentud y atacando generalmente , ta algo pa nos tene cuenta cune.
No ta cos di haci wega cune, pasobra maldad no ta haci wega cu ningun hende,e enemigo a bin solamente pa horta , pa mata y pa destrui, e no ta amigo y no ta chansa cu ningun hende.
Palabra di Dios ta bisa hopi cla den 1 Pedro 5:8 : Sea sobrio, sea alerta , Boso adversario . E diabel, ta cana rond buscando ken e por devora.
Kico ta pasando cu nos hubentud? No laga nos tapa solo cu un dede:
Tin hopi mucha jong ta purba destrui nan mes y hasta ta papia di suicidio,
Nan ta haci cosnan manera hende cu no ta pensa,
Of ta cansa di biba,
No ta stima nan bida,
No ta stima nan famia,
No tin interes pa studia,
No tin interes pa traha,
No tin interes pa biba decente,
No tin interes pa cana limpi y decente,
Ta cay den ladronicia, vandalismo y tambe ocaciona accidente.
Ta perde tur respet pa nan mes y otro hende.
No ta algo pa haci wega cune, pero si nos mira cuanto adicto nobo ta aparece riba caya, no ta cos di haci wega, ni tampoco haci politica cune, pero ta algo cu nos tur tin cu busca cara di Dios, pa yudansa (2 Cronicanan 7:14).
E acseso cu nos hobennan tin riba nan telefon ta locual cu antes no tabata por.
Awor via di telefon bo por mira tur tipo di maldad, inmoralidad, y perversidad.
Locual a wordo traha cu bon intencion awor a bira fuente di mal amistad, fuente di desorden ora e wordo mal usa, como mayor nos mester tene cuenta, cu tin cierto organisacion ta traha riba destruccion di hubentud den tur area di nan bida, cu musica sensual, cu ta invita hobennan riba caminda sexual, cu video, short films, series diabolico,un monton di cos pa destrui hubentud, fisicamente, mentalmente y spiritualmente.
Como mayor bo mester displina bo yiu pasobra bo ta stima bo yiu, no laga un mucha haci locual cu e kier, pasobra mayan e no ta bon bini ningun caminda, pero lanta e mucha den e berdad di Senjor. ( Hebreonan 12:7-11).
Uso di droga y alcohol bao di hubentud ta alarmente, y nos no por culpa ningun gobierno, pasobra educacion ta bini for di cas.
Ta kico a pasa cu awor hende ta stima trabao y placa mas cu nan yiunan, cu hende a bira asina haragan cu nan mester traha dos of tres trabao.
Tin hende den nos comunidad bibando bao di manipulacion for di exterior di hende cu ta cuida nan grandinan of yuinan pa nan den exterior y cu ta pidi cantidad di placa, pa manda placa constantemente, pasobra nan sa cu e economia di aki banda ta bon.Y pesey nan tin di traha varios trabao pa por cumpli cu esey.
E stiuacion cu ta reinando ta hopi delicado, e ta pone nos moral, integridad, etica, respet, y hasta nos turismo na peliger, si algo no wordo haci den seno familiar. Pasobra ora un hoben sali caya ta pidi placa, pa droga of ta ofrece su mes pa hanja placa pa bebe y droga nos ta laat.
Nos mester uni den oracion como pueblo pa Dios scucha y yuda nos.
Sinceramente Pastor Marcel Balootje
