Ora nos papia cu tin hopi mal influencia den aire, y cu tur hende mester tene cuenta cune, ta parce manera tin hende ta rabia, y bisa ta cos di misa of di iglesia atrobe, pero hopi ta lubida cu ta palabra di Dios, y Palabra di Dios ta fiel y berdadero, pasobra palabra di Dios, tey pa coregi, displina y pa pone hende riba e caminda corecto, pa nan pia no slip y asina cay den trampa diabolico.
Tentacion no ta respeta ningun hende,pesey hende mester aparta nan mes for di tur clase di tentacion y no bay play grandi of wise y bisa cu nada no ta pasa of kere cu nan ta duro, pasobra nos tur sa cu e enemigo a bini solamente pa mata, horta y pa destrui, asina ta no laga nos ignora su trampanan.
Ta para scirbi cu nos adversario e diabel , ta cana manera un leon cu ta grunja buscando ken e por devora.
Esey ta nifica cu nos mester mester somete na Dios y sea fuerte den Senjor y den e forsa di Su poder, pa nos por resiste e diabel, pasobra ta para scirbi cu nos lucha nota contra carni y sanger, pues no ta algo cu bo ta mira, pero ta un mal influencia cu ta purba na controla y destrui bo bida.( Efsionan 6:10-12).
Tene cuenta pa nos aparta for di pica, aparta for di inmoralidad, aparta for di inhusticia, pasobra pica ta asina malo, cu Dios mester a manda su Yiu unigenito (unico) pa muri na crus pa nos tur y asina nos por wordo libra di pica.
Y den Juan 3:16 Dios ta ofrece na nos tur e plan di salbacion pa nos bida, y te ainda tin hende ta haci chansa, tin ta haci cherche, bisando cu nan no ta cla, y ta kere cu ora bo entrega bo bida na Cristo ta hende bo ta complace, y nan no ta realisa cu esey ta e unico opcion cu a keda e ser humano.
Pesey den Juan 3:36 e palabra di Dios ta bisa nos cu: Esun cu ta kere den e Yiu tin bida eterna, ma esun cu no obedece e Yiu lo no mira bida, ma e furia di Dios ta keda riba dje.
Pasobra no tin palo bon cu ta duna mal fruta, ni palo malo cu ta duna bon fruta, pasobra cada palo ta conoci na su fruta.( Luvas 6:43-44).
E bon hende for di e bon tesoro di su curason,ta saca lo ke ta bon, y e mal hende for di e mal tesoro, ta saca loke ta malo, pasobra for di abundancia di curason boca ta papia.( Lucas 6:45).
Awor bo no por lanta un mucha malcria, sin displina na cas, y spera cu e ta bay duna bon presentacion dilanti hende, of na scol, of riba caya,bo no por permiti bagamunderia na cas, y bo ta spera seriedad riba caya of den hende, pasobra locual bo permiti, esey bo ta bay ricibi, pasobra mal influencia no ta respeta ningun hende.
Pasobra maske nos ta cana den carni, nos no ta bataya segun carni, pasobra e armanan cu nos ta bataya cune ta poderoso den Dios pa basha fortinan abao. Y pa destrui speculacionnan y tur arogancia, cu ta wordo lanta contra e conocemento di Dios.(2 Corintionan 10:3-5).
Asina bo nota algo cu no ta cuandra cu e palabra di Dios , den e actitud di bo yiunan, bo mester reprende e cos ey, no duna oportunidad na diabel.
Sinceramente, Pastor Marcel Balootje
