Gabinete Wever Croes ya no sa mas kico pa bisa of haci, pa trata di convence pueblo cu loke nan ta haciendo pa family and friends, ta algo totalmente legal y norma, miembro di partido AVP Melvin Tromp a mustra.
Principalmente e ultimo splicacion cu el a duna relaciona cu contract di cinco aña cu el a duna un grupo di su campañadonan, ta confirma cu pa partido MEP, interes di pueblo no ta conta, solamente interes di amigo, famia, campañadonan y sponsornan di MEP.
“Un biaha mas gobierno di Prome Minister ta mustra su parti di sin gevoel ora cu scucha con Minister Dangui Oduber, ta bin trata na hustifica algo cu simplemente no tin hustificacion den e tempo di crisis aki.
Ban ta serio, ta mustra como sifuera Minister Dangui no ta scucha ora cu su Prome Minister Evelyn Wever Croes papia, ya cu ta dos dia prome cu el a bay entrega autonomia di pais Aruba na Hulanda, Evelyn a bisa cu e mester haci esaki sino Aruba lo bay bancarota.
Apenas dos siman despues di e expresion aki, Minister Dangui ta confirma cu el a duna un grupo di su campañadonan cu ya caba ta trahando como su coordinadonan, contract di cinco aña pa transporta pashentnan pa haci dialyse y bay pa tratamento na hospital.
Pues e mesun pais bancarota aki cu Ptrome Minister ta papia di dje, si tin suficiente placa pa campañadonan cual ta bolbe mustra cu pueblo y e hende, no ta nunca central pa ningun gobierno di partido MEP.
No solamente cu henter e asunto aki ta algo sumamente delicado y di condena totalmente pero Minister Dangui ta trata di hustifica esaki sin hustificacion ya cu bisa cu loke el a haci no ta ilegal y ta algo masha normal, hasta bisando cu esaki a pasa den otro gobiernonan.
Den esaki Dangui tin razon, ya cu su persona mes ta producto di e tipo di maneho ey, caminda tanto Dangui como su ruman homber, a haya nombracion na Setar tempo cu su tata Nelson Oduber tabata Prome Minister, no solamente nan dos pero practicamente tur omo y tanta na dado momento, a haya trabou den gobierno di MEP.
E forma di goberna aki ta un patent di partido MEP ya cu actualmente ta dificil pa haya un miembro di famia di Prome Minister Evelyn Wever Croes, cu no ta trahando den gobierno y por anticipa cu lo duna tur e hendenan aki un nombracion vast prome cu e gobierno aki bay cas despues di eleccion.
Ta tristo cu Minister Dangui Oduber no a mustra ningun tipo di compasion pa trahadonan di e compania di transporte priva cu tabata encarga pa hiba pashentnan pa tratamento, hendenan cu a keda sin trabou pero pa Dangui e solucion tabata pa sigura trabou di su campañadonan, loke ta bolbe confirma e mentalidad descriminatorio cu su gobierno ta mustrando.
Ta hendenan cu ta na cas awo sin trabou pero Minister Dangui ta sigura futuro di su campañadonan cu e contract di cinco aña cu el a firma pa awor bin pretende cu ta algo legal y normal.
Ora cu scucha Dangui papia e cosnan aki ta mescos cu e bisa cu no tur ladron ta ladron, no tur crimen ta realmente un crimen pero ta depende di kendenan ta e ladron pa e wordo considera ladron y ta depente kende e criminal ta pa e por wordo yama criminal.
Drenta porta dilanti cu Minister Dangui, ta legal pero funcionarionan publico cu mester sacrifica pa motibo cu e situacion financiero ta malo, tambe ta legal y ta eynan nos por bisa cu e rabo di porco ta krul, mustrando un biaha mas e mentalidad di e gobierno aki, cu ta hancho pa nan cu ta den gobierno y pa pueblo smal sin posibilidad pa mehoransa bou di e gobierno actual,” Melvin Tromp di partido AVP a declara.
