Durante su bishita na Corsou, Prome Minister di Aruba, Mike Eman, a bishita Parlamento di Corsou, caminda el a ser ricibi pa Presidente di Parlamento, Fergino Brownbill, y representante di e diferente fraccion. E encuentro a brinda oportunidad pa un intercambio di pensamento tocante e trayectoria politico di Prome Minister Eman, su contribucion na desaroyo di e islanan y e importancia di sigui reforsa cooperacion entre Aruba y Corsou.
Presidente di Parlamento di Corsou, Fergino Brownbill, a destaca e importancia di e bishita, haciendo referencia na e legado politico di famia Eman y su contribucion na desaroyo di Corsou y Aruba.
Segun Brownbill, independientemente di diferencia di opinion politico, ta importante reconoce e papel cu famia Eman a hunga den desaroyo politico di Corsou, incluyendo su influencia como mentor pa diferente politico den nos islanan. Brownbill a splica cu e encuentro tabata un oportunidad pa expresa gratitud y reconocimento na Prome Minister Mike Eman, pero tambe pa reflexiona riba con por sigui construi riba e legado di cooperacion entre ambos pais. Un di e temanan central di e conversacion tabata con Aruba y Corsou por sigui traha hunto y aprovecha e experiencia y conocemento di Prome Minister Eman den futuro.
Juniël Carolina, di dos vice-lider di fraccion MFK, a destaca e trayectoria politico di Prome Minister Eman y e importancia di siña for di su experiencia. Durante e intercambio, Carolina a mustra interes den e decisionnan dificil cu Eman a enfrenta durante su carera politico y e manera cu el a maneha e responsabilidadnan cu ta acompaña liderato politico.
Di banda di PNP, Sheldry Osepa, kende a representa e fraccion den ausencia di su lider di fraccion y lider di partido, cu ta na Boneiro, a destaca e importancia di e encuentro como fuente di inspiracion pa generacionnan nobo di politico. E intercambio a brinda oportunidad pa reflexiona riba e desafionan di liderato y e importancia di siña for di experencia di e personanan cu tin un trayectoria largo den politica.
Quincy Girigorie, lider di fraccion PAR, a expresa reconocimento pa e servicio cu Prome Minister Mike Eman a brinda na Aruba y su contribucion na e relacion entre e islanan. Girigorie a destaca e importancia di aprecia e esfuersonan di lidernan politico cu a contribui na desaroyo di nan pais y na fortalecemento di cooperacion regional.
Di su parti, Giselle Mc William, lider di fraccion MAN/PIN, a pone enfasis riba e importancia di reforsa cooperacion entre Aruba, Corsou y Boneiro, particularmente den e intercambio di conocemento y experiencia. Mc William a presenta e idea di un plataforma no politico, caminda e lidernan cu tin experiencia amplio por comparti nan conocemento cu futuro generacion y gobernacion. E iniciativa aki lo por contribui na preservacion di experiencia politico y administrativo, permitiendo cu e conocemento acumula durante varios aña di servicio publico por sigui ser probecha den beneficio di e islanan.
E pensamentonan aki ta den liña cu e importancia di cooperacion regional, caminda Aruba, Corsou y Boneiro por siña uno di otro y identifica e oportunidadnan pa enfrenta e desafionan cu tin den comun.
E bishita di Prome Minister Mike Eman na Parlamento di Corsou a brinda un oportunidad pa fortalece e dialogo entre representantenan politico di ambos pais, reconoce e importancia di experiencia acumula durante añanan di servicio publico y reafirma e necesidad di sigui traha hunto den beneficio di Aruba, Corsou y e region.
