Den e tempo special aki di aña, temporada di Pasco ta invita nos pa para un momento, pa reflexiona, pa duna danki y pa wak cu speransa nos dilanti. Tambe ta un bon momento pa mira bek riba un aña cu hopi actividad y presentacion a tuma luga na Biblioteca Nacional Aruba, un aña di crecemento, reconocemento y innovacion.
Durante e aña, nos tabata tin e honor cu hopi buki a keda presenta na Biblioteca Nacional Aruba, E publicacionnan aki a fortalece nos literatura y nos herencia cultural. Den cuadro di 75 aña di trabou di biblioteca, a tuma luga presentacion di e buki, ‘Capital Humano entre buki y arte’. A organisa diferente exposicion cu a conta entre otro historia di nos hendenan. Asina, biblioteca a sigui ta un luga di encuentro, conocemento y inspiracion pa nos comunidad.
Por menciona diferente reconocemento y premio cu biblioteca a ricibi na 2025. Pa menciona algun, dia 17 di april 2025 United Nations Educational, Scientific and Cultural Organization (UNESCO) ta certifica inscripcion di (Aruba Addition to Existing Inscription) Documentary heritage of the enslaved people of the Dutch Caribbean and their descendants (1816-1969), The National Library of Aruba, on the Memory of the World International Register. Durante clausura di e conferencia di ACURIL, dia 12 di juni na Corsou, e medaya di Caribbean Professional of the Year 2025, di Association of Caribbean Universities, Research and Institutional Libraries (ACURIL) a bay pa director di Biblioteca Nacional Aruba, sra. Astrid Britten. E premio aki ta un gran honor pa e institucion y, mas importante ainda, un reconocemento di e trabou duro, compromiso y profesionalismo di biblioteca su ekipo. E ta confirma cu loke nos ta haci tin balor y ta importante. Coleccion Aruba, Biblioteca Nacional Aruba & Archivo Nacional Aruba, ta ricibi tambe e premio di ‘Innovative Cooperation Initiatives in the Caribbean di OCLC’.
Ademas, biblioteca a duna pasonan importante den innovacion y transformacion. Instalacion di e “Selfcheck Bookcheck” ta un bon ehempel di esaki. Na 2026 e sistema lo ta operacional. E sistema aki ta haci su servicio mas eficiente y accesibel pa tur usuario, y ta mustra e deseo pa sigui evoluciona cu e tempo, sin perde fe bista nos balornan fundamental. Un biblioteca awe no ta solamente un luga pa warda bukinan, pero un centro bibo di conocemento, tecnologia, cultura y comunidad. Cu biblioteca ta sigui cumpli e rol aki cu vision y determinacion, ta danki na su colaboradornan, partnernan y tur hende cu ta sostene y apoya trabou di biblioteca.
Gerente y staff di Biblioteca Nacional Aruba ta desea henter comunidad un Pasco bendiciona y un Aña Nobo yena di salud, prosperidad y speransa. Cu aña 2026 trece inspiracion, harmonia y progreso pa henter comunidad.
