Adam y Eva tabata desobediente nan a purba sconde pa Dios, pero Dios a saca tur cos na cla y nan dos a sali perhudica.
Rey David tabata desobediente, e a comete adulterio y manda mata hende, pero Dios a saca tur cos na cla y Rey David y su famia a sufri e consecuencia di su desobediencia.
Rey Saul tabata desobediente na Dios, pasobra e no a respeta e orden cu Dios a dune, e a perde su corona, pasobra Dios a rechase, y Rey Saul y henter su famia a sufri e consecuencia pa motibo di su desobediencia.
Ananias y Safira tabata desobediente na Dios, nan a laga satanas ganja nan y asina nan a purba ganja e Spirito Santo di Dios, y esey a costa nan bida.
Ningun hende no por ganja Dios, pasobra cu tempo tur cos lo sali na cla, y aunke mentira tuma lift, berdad ta alcanse na trapi.
Nos ta bibando den un tempo, caminda falta di respet, desobediencia a bira manera algo di competi cune, algo di haci show ken por ganja mihor, ken por biba mas bruha posibel, ken por trose berdad mas tanto, y hasta ken por ganja su mes mas mihor.
Hende ta desobediente y mentiroso awe, y no ta worry e consecuencia di locual nan a haci pa majan.
Hende ta traha yiu awe, pero no ta worry cu mayan e mucha ey mester wordo cria y bon educa.
Hende ta adultera awe y no ta worry e consecuencia pa nan mes y nan famia pa mayan cu Dios kier.
Hende ta ganja nan mes cu resultado di dokter, nan ta mira locual tin scirbi, pero toch nan ta sigi den nan desobediencia contra nan propio salud.
Hende ta pretende cu nan mester wordo respeta, pero toch ta cana rond den bisti perverso, den cual nan curpa ta wordo bendi barata manera carni riba marshe.
Hende a tende di e berdad y cu e berdad di Dios ta haci hende liber, y nan ta na altura cu cielo y tera lo pasa, pero e palabra di Dios lo no pasa, pero toch nan kier purba nan chens y rechasa e plan di salbacion cu Dios ta ofrece,
Hende ta falta respet pa ley cu tur consecuencia negativo cu esaki por tin , pasobra nos tur mester corda, cu tur ley aki na tera a wordo saca for di ley estableci pa Dios.
Hende a yega asina lew di haci manera ta para scirbi: Ay di esun cu ta yama loke ta malo bon,y loke ta bon malo, loke ta scuridad lus,y loke ta lus scuridad,loke ta marga dushi, y loke ta dushi, marga.( Isaias 5:20).
Complaciendo inmoralidad, y haci bofon di Dios, hende ta yega na aproba locual Dios ta aborece, pasando mentira como un hecho legal y asina troce e berdad di Dios.
Deobediencia y mentira por pone hende cana sunu y pretende cu nan tin panja bisti, y e mesun cos, por pone hende cana burachi y droga y pretende cu nan ta completamente na tino.
Esun cu sconde su pica lo no prospera, ma esun cu confesa su pica lo hanja misericordia.
Mentira y desobediencia, ta e cuna di diabel, ta eyden e y su compinchenan ta lock especialmente nos hobennan y pone nan pensa cu tur cos por wordo haci y tur ley por wordo kibra y nada no ta pasa.
No tin nada scondi cu lo no sali na cla, Dios ta stima tur hende, pero Dios ta odia mentira y desobendiencia.
Dios ta lus, Dios no ta cambia.
Sinceramente Pastor Marcel Balootje
