5 di november lo a bira e dia cu e coalicion nobo di oposicion consistiendo di RAIZ, ACC21, FUTURO, MAS y AVP lo mester a sacia nan sed di vengansa, nan maniobra pa destabilisa nos pais, nan arma pa causa discordia , a traves di un mocion di desconfiansa contra nos Lider di Partido, Minister President di nos Pais, Evelyn Wever – Croes.
E show politico aki di e coalicion nobo a termina den un spetakel.
RAIZ a uni cu oposicion
Laga nos repasa e echonan un rato. RAIZ a dicidi di uni su mes na oposicion pa baha Edgard Vrolijk como Presidente di Parlamento kibrando palabracion di gobernacion. Despues di a logra esaki, e siguiente tabata Endy Croes e Minister cu a sa di trece paz den enseñansa y cu a haci masha hopi mes pa deporte. Sin motibo valido algun, sin prueba algun, a dicidi di baha Endy Croes como Minister a traves di un mocion di desconfiansa. Despues di reunion ey e coalicion nobo a laga sa cu un pa un lo baha e Ministernan.
Pa loke ta trata RAIZ, e dia cu nan a baha Edgard Vrolijk como presidente di parlamento teniendo awo mayoria den parlamento tabatin e intencion di estando den Gobierno cu MEP, baha e Ministernan di MEP pa nombra miembronan di nan coalicion den parlamento pa finalmente secuestra Gobierno di Aruba, coriendo cu tur Minister di MEP, e partner mas grandi den coalicion.
Prome Minister a disolve Parlamento di Aruba
Minister President Evelyn Wever – Croes, mirando cu a kibra palabracion kibrando tur acuerdo y confiansa, a disolve Parlamento di Aruba. Esaki RAIZ no a premira y aki ta unda e racha di rabia y persecucion a cuminsa.
E coalicion di maldad di RAIZ, ACC21, FUTURO, MAS y AVP ya tabatin e acuerdo cu si hunto nan logra e mayoria den eleccion di 6 di december proximo, cu nan lo forma Gobierno maske MEP sali e partido cu mas asiento. E mesun maniobra aki AVP a haci eleccion 1985.
Reunion den Parlamento un spektakel total
Pero e reunion di awe no a bay manera cu e coalicion nobo tabata kier. Nos por a tende Marisol Tromp den su disertacionnan exigi pa cambia e reunion pa un reunion publico pasobra cu e kier entrega mocion contra nos Minister President. E tabata asina rabia cu cierto momento el a hasta trece un mata pone banda di Minister President di Aruba. Pues un spetakel total nunca antes bisto den e organo mas halto di Aruba. Como sifuera poco, ora cu Ministernan Evelyn Wever Croes y Rocco Tjon a demostra cu hecho y prueba cu no tin metemento algun den Ministerio Publico, Marisol Tromp a dicidi riba su mes pa cambia topico di reunion y kier a papia riba rapport di Algemene Rekenkamer. Locual cu Marisol no a realisa ta cu tur locual cu el a subraya di e rapport di ARA, a sosode tempo cu e mes, esta Marisol Tromp mes, tabata Minister di entro otro Serlimar.
Un Gerlien Croes cu tampoco tabata contento cu e no por a entrega/sostene e mocion pa baha nos Lider di Partido, a dicidi di bandona sala pa bay yora den un programa di noticia. Lider di ACC21 Miguel Mansur, despues di a yama tur hende den tribuna pa ladron, a dicidi di ataca Gerlien “cu no a mata niun muska” refiriendo na e falsedad di Gerlien.
Un reunion cu tabatin e atencion completo di nos pueblo, a bira testigo di kico ta spera Aruba si e coalicion di maldad aki mester goberna nos pais. Esey lo hinca Aruba den un destabilidad total pasobra awe nan cu nan a bringa caba. Nan cu nan a baha nan mes sin sinta goberna ainda.
MEP ta pidi sosten di pueblo
6 di december proximo MEP ta pidi nos pueblo un mandato cla. MEP a sa di rescata nos pais di un decadencia moral di corupcion ocasiona pa AVP. MEP a sa di rescata nos pais di un debe astronomico di mas di 2000 miyon (dosmil miyon) florin ocasiona pa AVP. MEP a sa di mantene nos pueblo cu cabes riba awa durante e pandemia mundial di COVID. MEP y nos Lider Evelyn Wever Croes a sa di para firme contra Hulanda ora cu nan tabata kier pa nos entrega nos autonomia. MEP porfin a logra, cu sacrificio di nos tur cu ta biba riba e baranca aki, pa cera presupuesto cu un surplus. Pues awo ta e momento pa MEP bolbe bek den Gobernacion pa demostra na nos digno pueblo con nos lo inverti den baha costo di bida, aumenta penshun di nos grandinan responsablemente, duna nos hendenan mas poder di compra, baha prijs di awa y coriente, sigui mehora servicio medico djis pa menciona algun. Despues di rescata nos pais awo a yega e momento pa MEP sigui inverti den nos Pueblo.
E stabilidad aki Aruba tin e y merece danki na Movimiento Electoral di Pueblo.
