Minister Geoffrey Wever a bin Parlamento pa un reunion cu el a pidi riba temanan di belasting y con pa desaroya nos economia. Minister a introduci 4 areglo di incentivo di belasting dia 1 di januari 2026 pa comerciantenan di San Nicolas y Playa, pa esnan cu kier cuminsa un negoshi den cierto areanan, y pa profesionalnan den exterior pa bin Aruba y ta gana mas di 150 mil florin.
Gabinete Wever-Croes a traha hopi duro pa crea un fundeshi financiero solido pa e gobierno di turno duna bek na comunidad. Y nan trabou den Parlamento awor ta pa vigila si e gobierno ta sigiu riba e rumbo financiero responsabel y evita cu nan ta kibra e fundeshi financiero cu a traha asina duro riba dje.
Duarnte e reunion, Parlamentario Evelyn Wever-Croes di fraccion di MEP a haci Minister Geoffrey Wever como 75 pregunta riba e notanan di maneho cu el’a introduci dia 1 di januari 2026. Mayoria di e preguntanan a bin di profesionalnan local cu a señala varios riesgo y preocupacion.
Na su turno e minister concerni no a contesta ni mitar di e preguntanan aki, y tabata bastante irita cu el’a haya tanto pregunta. Presidente di Parlamento tampoco no a haci nada pa fraccion di MEP por haña contesta riba tur e preguntanan aki.
Parlamentario Wever-Croes a pidi e estudionan di impacto financiero, social y economico di e 4 manehonan, pero e minister kiermen cu nan no ta necesario y a admiti cu e no a haci ningun di e estudionan aki. Esey ta hopi lamentabel mirando cu a pensa cu e minister aki tabata mas serio den su funcion como Minister di Economia. Pero asina aki ta ken cu ta por goberna.
Un preocupacion serio ta si e areglonan nobo aki lo logra nan meta di diversifica Aruba su economia. Minister no a haci un estudio riba esaki y ta bisa cu ta spera cu e lo logra. Y si aki un aña resulta cu no logra, lo wak kico por haci.
Parlamentario Wever-Croes tambe a trece dilanti cu si di berdad gobierno kier stimula entrepreneurship, innovacion y diversifica e economia, cu lo tabata miho pa e minister scohe pa traha cu subsidionan dirigi na esnan cu bo kier yuda, en bes di bin cu reduccion di belasting pa un grupo grandi sin ningun garantia.
Esaki ta muestra cu e minister aki tin falta di vision. Riba dje e areglonan nobo aki ta yuda comerciantenan di Playa y San Nicolas cu “tax holiday”, y profesionalnan den exterior pa bin Aruba bek, pero esaki lo yuda solamente riba termino corto. Ademas sin soluciona tur otro reto pa e inversionistanan of profesionalnan, bo lo no logra bo meta. Ta placa benta afo e ta.
Locual a hala mas atencion ta e decision unilateral di Minister Geoffrey Wever cu comerciantenan den Playa y San Nicolas so ta haya “tax holiday” pa 10 aña si nan drecha nan edificio. Comerciantenan den Brasil, Savaneta, Pos Chikito, Santa Cruz, Paradera, Tanki Leendert, Dakota, Simeon Antonio y Noord no ta haya e mesun beneficionan. Pakico? Pasobra e a dicidi, sin haci un estudio, y sin consulta cu Parlamento. E so a dicidi!
Finalmente mester remarca cu e maneho aki tabata bai linea recta contra e “bon comun” cu minister president ta papia di dje. Ta obvio cu no tin alineamento den e gabinete AVPFuturo cu mas bien ta parce un barco sin capitan. Fraccion di MEP a trece varios pregunta y preocupacionnan padilanti den e reunion, mayoria e minister no por of no kier a contesta. Mester bisa cu e notanan di maneho a wordo bon prepara pa nos profesionalnan, pero Minister Geoffrey Wever su vision y curashi politico ta limita y esey ta causa hopi preocupacion den fraccion di MEP.
