“Ora ta trata di honestidad, transparencia, y progreso pa tur, no mester core ni sconde. Nos di MEP no t’aki pa acusa, nos t’aki pa un solo rason: exigi informacion pa e BERDAD sali na cla. Ta nos trabou como bo representante pa percura cu tur cos ta cana segun ley”, asina lider di MEP sra. Evelyn Wever-Croes a duna di conoce den un entrevista riba medionan social e siman aki.
Pasobra, e minister en cuestion, te awe ainda, despues di 2 luna, no a duna claridad, y no kier contesta e preguntanan di oposicion. Fraccion di MEP a cuminsa un proceso huridico di “LOB”, basa riba e Landsverordening Openbaarheid van Bestuur. Y si e minister keda sin contesta, e fraccion lo hiba e minister Corte.
E ley ta un ley cu ta obliga Gobierno pa ta habri y honesto cu pueblo. “Basicamente, e ta un ley cu ta duna abo, como ciudadano, e derecho di pidi informacion oficial di Gobierno. Nos a uza e ley aki pa abo haya claridad riba e biahe di trabou den jet priva di Minister Gerlien Croes pa Corsou”.
Minister Gerlien Croes na comienso a bisa cu e asunto aki ta masha “simpel”. Pero, si e ta asina simpel: pakico Minister tin pueblo 2 luna caba ta haci e mesun preguntanan? Y riba dje awor, pakico Minister ta pidi 3 siman extra pa pensa con pa contesta?
Ta 3 pregunta cu Pueblo kier haya contesta:
* Ken a paga e biahe priva?
* Ki dia a paga e biahe priva?
* Cuanto a paga pa e biahe priva?
E mesun preguntanan aki nos tin dos luna ta haciendo e minister, y ainda AWE e ta pidi 3 siman extra pa mira con ta bay “contesta”.
Pueblo ta keda pendiente di contesta. Pueblo kier sa, unda cu nos bai ta e mesun pregunta nos ta haya, hasta nan propio votadornan ta puntra ta con e cos aki ta hinca den otro. MEP tey pa informa, MEP tey pa percura pa e berdad.
Lider di MEP Evelyn Wever-Croes a finalisa bisando: “Nos no kier speculacion, nos kier e prueba. Si e Minister a paga di su mesun cartera manera el a bisa, e comprobante t’ey caba. Toch? MEP ta para pa transparencia; nos tey pa informa bo y pa percura cu cosnan ta wordo haci corectamente. Pueblo ta keda pendiente di e berdad.”
