Pa motibo di falta di transparencia di banda di gobierno, nos como miembro di Parlamento a keda obliga pa presenta un peticion formal bou di e Landsverordening Openbaarheid van Bestuur (LOB), pa haya acceso y copia di un carta di 14 di augustus 2025 di e Staatssecretaris di Asunto Interno y Relacionnan di Reino, tocante e Rijkswet HOFA.
Durante e reunion publico di Parlamento, a wordo pidi varios biaha pa e carta aki wordo entrega na Parlamento. A pesar di esaki, te awor gobierno a nenga pa duna Parlamento e carta en cuestion.
Nos ta hay’e hopi preocupante cu nos, como representante di pueblo, mester haci uzo di un ley pa asina obliga gobierno pa duna nos informacion. Si miembronan di Parlamento mes no ta ricibi informacion cu ta esencial pa nos tarea di control, con ta para cu abo cu ta entrega un peticion cerca gobierno? E situacion aki ta mustra nos tur con leu e gobierno a yega di e principionan di transparencia, responsabilidad y respet pa nos constitucion y abo.
Na e ceramento di e aña parlamentario aki na september ultimo, a resulta cu casi 80% di tur pregunta haci door di Parlamento a keda sin haya contesta. Aworaki nos ta ripara cu ta e mesun manera di traha aki Gobierno ta sigui cune y no solamente no ta contesta pregunta, pero tambe ta nenga di duna nos documento cu nos tin derecho pa haya segun nos constitucion.
