Fraccion di Movimiento Electoral di Pueblo (MEP) a dirigi un peticion na Presidente di Parlamento di Aruba pa tuma un posicion formal tocante manera cu gobierno a trata e proceso rond di rijkswet Houdbare Overheidsfinanciën Aruba (HOFA).
Segun MEP, ta inaceptabel cu Parlamento, como organo mas halto den nos pais, no a wordo informa y no por a tuma parti den e proceso aki. E manera di actua aki ta pone Parlamento completamente na banda y ta mina nos democracia parlamentario.
Ademas, MEP ta indica cu e manera cu gobierno a actua ta un violacion directo di e acuerdo cu a wordo firma durante Interparlementair Koninkrijksoverleg (IPKO) na 2022, unda transparencia y participacion parlamentario a wordo poni como base (consensus).
MEP ta haci un yamada urgente na Presidente di Parlamento pa Parlamento fiha un posicion formal, prome cu e reunionnan di IPKO na september. Asina so e delegacion di Aruba por participa cu legitimidad y papia na nomber di pueblo.
