Fraccion di MEP a tuma nota cu hopi preocupacion di articulonan den prensa cu ta indica cu Conseho di Minister di Hulanda a duna Secretario di Estado Eric van der Burg un mandato pa negocia cu Gobierno di Aruba tocante cambionan den e propuesta di Rijkswet Houdbare Overheidsfinanciën Aruba (HOFA).
Si e informacion aki ta corecto, ta inaceptabel cu Parlamento di Aruba no a wordo informa pa Gobierno, sino cu parlamentarionan mester a haya e informacion aki pa medio di prensa.
HOFA no ta un ley ordinario. E ta un ley di Reino cu ta toca directamente autonomia financiero di Aruba manera Raad van State y Raad van Advies a confirma y, como tal, e posicion constitucional di nos pais den Reino. Precisamente pa e motibo ey, Gobierno tin obligacion di informa Parlamento na tempo, di forma completo y di su propio iniciativa riba desaroyonan, negociacionnan y cambionan cu ta wordo considera.
Parlamento por ehece su tarea di control y su responsabilidad den proceso aki solamente si e tin acceso na tur informacion relevante. Esaki ta mas importante ora cu ta negocia tras di cortina posible cambionan den un ley cu por tin consecuencianan serio pa futuro di Aruba.
P’esey, Fraccion di MEP a manda preguntanan por escrito na Prome Minister. Entre otro, fraccion di MEP ta pidi claridad riba cua cambionan ta wordo discuti, cua ta posicion di negociacion di Gobierno, ki conversacionnan a tuma lugar caba y pakico Parlamento no a wordo informa. MEP ta exigi tambe cu tur documentonan relevante, conceptonan di texto y correspondencia relaciona cu e negociacionnan aki wordo entrega sin atraso na Parlamento.
