ORANJESTAD – Fraccion di MEP a entrega un peticion oficial na Presidente di Parlamento pa Servicio Central di Contabilidad (CAD) haci un investigacion independiente riba denuncianan di posibel iregularidad durante organizacion di bishita oficial di Su Mahestad Rey na Aruba na maart 2026.
Segun e carta entrega dia 18 di mei 2026, e partido ta bisa cu a ricibi diferente kehonan y señalnan relaciona cu posibel abuso di poder, faboritismo y maneho incorecto den e procesk di preparacion di e bishita oficial.
E kehonan principal ta relaciona cu e contratacion di e banda musical nacional cu a participa den e evento oficialnan. Ta ser bisa cu un miembro di e comision organizador, Zuleika Wever, aparentemente lo a faborece hendenan cerca di dje den e procesk mal usando su funccion, cual a influencia cierto seleccion y otorgacion di contrato.
MEP a bisa cu e acusacionnan ainda no a wordo comproba oficialmente, pero partido ta considera cu e gravedad di e señalnan ta suficiente pa un investigacion obhetivo y transparente.
Den su peticion, MEP ta pidi pa CAD evalua:
1. si procedimentonan financiero y administrativo a wordo sigui corectamente;
2. si gastonan y contratonan a wordo maneha conforme ley;
3. si tabatin conflicto di interes of faboritismo;
y si tin motibo pa tuma otro medidanan di control of investigacion.
MEP a indica cu confianza di pueblo den gobernacion ta depende di transparencia y responsabilisacion, y pa e motibo ey ta considera importante pa haya claridad mas lihe posibel riba e asunto aki.
Te ainda, no tin reaccion oficial di CAD of di Gobierno tocante e peticion presenta door di MEP.
E keho publico a yega Parlamento di Aruba via un carta anonimo cu ta splica den detayes, con e faboritismo a tuma lugar.
