ORANJESTAD – Merca a manda su vliegdekschip nobo, USS Gerald R. Ford, hunto cu un flota grandi, pa Caribe. E mision principal ta pa intensifica e lucha contra e contrabanda di droga den e region aki, un desaroyo cu ta toca Aruba tambe.

E presencia militar grandi aki ta bin despues cu Merca a aumenta su presencia for di Augustus, incluyendo avionnan di combate F-35 y un total di mas o menos 6.500 militar. E vliegdekschip ta wordo mira como un escalacion significante den e operacionnan.

Vocero di Merka, Sean Parnell, a declara cu e presencia aki ta bay “aumenta e capacidad Mericano pa detecta, monitorea y kibra actividadnan ilegal y actornan cu ta menasa seguridad Mericano.”

Operacionnan Controversial y Enfoke riba Venezuela

E enfoke fuerte riba contrabanda di droga riba lama ta bin bou mando di Presidente Donald Trump. For di cuminsamento di September, e forsa militar Mericano a ataca por lo menos dies (10) boto sospechoso di droga den Caribe y Oceano Pacifico, unda cu por lo menos 43 persona a perde nan bida.

E atakenan aki ta causa hopi discusion, ya cu nan ta tuma luga den awanan internacional y e personanan no ta wordo aresta prome. Pete Hegseth, Minister di Guera, a mustra cu nan no tin intencion di cambia e curso aki, bisando publicamente: “Nos lo persigui boso y mata boso.”

Presidente Trump a dirigi su atencion specialmente riba Venezuela. E ta planea pa pronto cuminsa operacionnan contra cartelnan di droga den e pais ey, un decision cu e CIA a ricibi autorisacion pa ehecuta caba.

E gobierno Venezolano, bou di Presidente Nicolás Maduro, a reacciona fuertemente, yamando e decision aki un violacion di ley internacional. Maduro ta mira esaki como un intento pa legitima un “cambio di regimen” y acusa e CIA di kier organisa un “golpe di estado”.

Pa Aruba y e islanan den Caribe, e aumento di presencia militar Mericano ta nifica mas vigilancia den e awanan rond di nos region.