Diahuebs ultimo, Merca a emiti un advertencia nobo di “no biaha” pa Venezuela, urgiendo su ciudadano y residentenan pa evita drenta of keda den e pais pa motibo di e riesgo halto di detencion arbitrario, tortura, secuestro, abuso policial, crimen violento y disturbio civil.
“E gobierno di Merca ta adverti cualkier ciudadano Mericano of residente den e pais pa no biaha ni keda na Venezuela”, e mision diplomatico di Merca a indica, cu ta operando for di Colombia.
E comunicado ta enfatisa cu e ciudadanonan Mericano por confronta violacionnan grave na nan derecho humano riba teritorio Venezolano. Tambe a recorda cu e Embahada di Merca na Caracas a keda cera desde 2019 y cu, den caso di detencion, mester notifica esaki na e adres di email ACSBogota@state.gov.
NO BIAHA
E Gobierno di Merca ta adverti cualkier ciudadano Mericano of cu tin cualkier tipo di residencia na Merca, pa no biaha ni keda na Venezuela pa motibo di e riesgonan serio di detencion ilegal.
Tension ta subi
E advertencia ta tuma luga memey di un episodio nobo di tension entre Washington y e gobierno di Nicolas Maduro, despues di e despliegue militar Mericano den Caribe contra narcotrafico, un operacion cu Caracas a denuncia como un menasa pa su soberania.
Pa varios aña caba, Venezuela a keda na nivel 4 di riesgo (“Do Not Travel”), e categoria mas halto den e sistema di alerta di e Departamento di Estado, pa motibo di e insiguridad generalisa, e falta di ley y orden y e persecucion politico.
