DEPORTE – Lionel Messi a bay di acuerdo pa uni su mes na Paris Saint-Germain riba un contracto di dos aña, segun diferente publicacion.
E seis biaha ganado di Balon di Oro tabatin dos otro opcion despues di bandona Barcelona siman pasa, pero a scoge pa move pa e club Frances riba un acuerdo cu un acuerdo balora na rond di 30 miyon euro pa aña (despues di kita belasting), mas bonusnan.
PSG y Messi lo tin e opcion pa extende su presencia den e capital cu un aña mas, mientras cu e delantero lo ricibi tambe un bonus di casi 30 miyon euro na momento di firma.
Messi tabata den proceso di extende su presencia di 21 aña cu Barcelona door di firma un contracto nobo pa cinco aña. Sinembargo, e club a anuncia siman pasa diahuebs cu debi na “obstaculonan financiero y structural” no por a finalisa e acuerdo, loke a causa cu Messi a keda como agente liber.
E futbolista di 34 aña a bisa cu e kier keda Barcelona y a “haci tur lo posibel” pa e por keda den e club, incluso a bay di acuerdo cu un reduccion di 50% den su salario.
Sinembargo Barcelona ta man mara cu reglanan di La Liga riba gastonan cu clubnan por haci y hasta reduciendo salario di Messi na mita no ta suficiente pa sigura su permanencia na Nou Camp.
Messi a yega Paris caba awe den compania di su famia, unda cu e lo kier logra trofeonan grandi – incluyendo Liga di Campeonnan, cu a hunga un rol importante den su decision pa muda pa Francia, Pero tambe e ta contento di por topa bek cu Neymar, cu kende el a gana dos titulo di La Liga, tres Copa del Rey y Champion League durante nan tempo hunto na Barcelona.
Siman pasa den un conferencia hopi emocional Lionel Messi a tuma despedida di e fanaticada di Barcenlona, cu awa na wowo.
