E mundo di politica na Aruba ta hasiendo un “denk fout”. Nos por constata cu Parlamento, hunto cu Partido MEP a traha riba un ley di screening di minister nobo. Sigur ta un ley nobo, cu lo segura cu esun cu bira minister, mester pasa den un proceso profundo di control.
Pero, dicon te ora di bira minister? Asina bo ta laga espacio habri pa politiconan por subi lista, bari mop cu voto, haya 4000 voto, pa despues pasa den control y pa despues bin haya sa cu e no por bira minister. Esey ta bira e ora un “kiezers bedrog”.
Esnan cu a pensa e ley di screening di Minister, mester por a pense mas mihor. No ta ora cu bira minister mester pasa e control riguroso, pero ta for di momento cu bo postula bo mes riba lista, e ora ey mester pasa un screening riguroso pa asina bo wordo accepta.
Ora bo wordo eligi cu voto popular di pueblo, pueblo no mester keda decepciona cu bo no por funcciona.
Pues, ta na ora ainda pa e autornan di e ley di screening por corigi nan fout, y no haci esaki ora di bira minister, pero hasiele ora di subi lista. E ora lo no tin wega cu e pueblo electorado.
