Opinion Publico di Lector:
Dianan liber na Aruba ta simplemente dimas! E sector gubernamental cu mester brinda servicio na e sector comercial tin demasiado dianan liber.
Den pasado gobernantenan a haci uso di dia liber pa asina cera deal cu sindicatonan, pero den e temponan actual, tantisimo dianan liber no ta mustra di ta algo efectivo tampoco productivo.
A para bira cu pa cada dia liber cu tin, ta plak un dia extra liber di ATV su tras.
Pues pa cada dia liber cu comercio ta haya, sector gubernamental ta haya un mas, totalisando dos.
Tur cos ta tranca, tur servicio ta tranca, no tin productividad. Servicionan cu mester keda cla rapido, por dura trankil 3 pa 4 luna, pasobra cada ves tur cos ta dal para.
Segun e opinion treci dilanti di nos lector, e ta bisa cu pa pasa un simpel akte na Notario di compra/venta, e proceso cu nan mester manda screen na belastingkantoor por dura lunanan largo, pasobra belastingkantoor no ta contesta Notario y asina tur desaroyo di pais ta keda tranca.
Minister di Finansas no tin control di cuanto tardansa su departamento di belasting ta ocaciona na varios aktenan di compra/benta? Cu tur consequencia cu e cumprador cu kier desaroya, ta sufri perdida financiero, dor di no cuminza na tempo?
Minister di Infrastructura no tin control di cuanto tardansa su departamento di DIP ta ocaciona, na varios aktenan di prolongacion, renobacion di erfpacht, cu tin 2 aña tranca, sin por keda cla?
Pa cada dia liber oficial, a hinca un pia cu ATV dag, hasiendo asina di 1 dia liber, full un weekend largo.
E situacion aki a wordo tolera bastante, pero ta ora pa gremionan tambe cuminza lansa nan opinion y hasiele un debate publico, den forma constructivo, pa asina pone un paro na e trancamento aki.
Ta yega ora pa un contrato laboral nobo cu empleadonan publico, cu por ta uno eficiente, productivo, den bienestar di nos pais.
