Durante e bishita di delegacion parlamentario na Hulanda, parlamentarionan di AVP a haya un update di presentacion importante di parti di de Nationale Ombudsman referente na e estudio “Kopzorgen van Caribische Studenten”. E estudio aki a identifica claramente e retonan grandi cu studiantenan di Caribe Hulandes ta enfrenta ora nan ta bay studia na Hulanda, tanto den area administrativo, como personal y social.
Un di e punto principal cu a surgi ta cu hopi biaha e dificultadnan ta cuminsa lunanan prome cu nan yega, ora nan no tin suficiente informacion of e proceso administrativo ta tuma hopi tempo. Segun e presentacion, pa combati esaki lo implementa algun medida concreto: DUO lo amplia informacion y comunicacion pa studiante, asina nan por haya orientacion mas cla prome cu nan sali di e isla.
Ademas, a introduci un sistema pa sigura cu studiante ya tin su BSN number asigna prome cu nan yega na Hulanda, evitando retraso den tramitacion y acceso na servicio. Tambe lo tin un enfoke mas fuerte riba guia y pa compaña studiante prome y durante nan estadia den Hulanda, pa yuda nan adapta y logra exito academico.
E Nationale Ombudsman a pone hopi enfoke riba bienestar di studiante: nos mester yuda nan miho, crea un base solido pa nan estudio y evita cu nan ta desanima cual sa pasa hopi biaha den transcurso di nan estudio.
Delegacion di AVP ta resalta cu e medida aki ta un paso importante pa sigura cu studiante di Aruba y resto di Caribe Hulandes por haya un experiencia educativo husto, digno y cu mas oportunidad pa prospera.
