Cu sabiduria un cas ta wordo traha, y cu comprendemento e ta wordo estableci.(Proverbionan 24;3).
Bendiciona ta esnan cu ta haci pas, pasobra nan lo wordo yama yiunan di Dios.( Mateo 5:9).
Mira ki bon y ki dushi ta, pa rumannan biba hunto den harmonia.(Salmo 133:1).
Ta tristo pa mira division den famia, caminda hende ta biba den mes un cas pero nan relacion no ta bon cu otro.
Hende ta ta comparti mesun tereno, pero nan ta dividi for di otro,nan no ta papia cu otro.
Hende ta corre den mesun auto, y ta parce manera nan ta bon cu otro, pero nan curason ta aparta for di otro.
Hende ta comparti mesun cama, pero nan amor ta leu for di otro.
Ruman no ta papia cu ruman.
Y esey ta locual e enemigo ta gusta pa hende no biba bon cu otro, pasobra biba bon cu otro ta un senjal cu ta demostra cu nos ta yuinan di Dios.
Ora nos ta biba bon cu otro, nos forsa, fisico, spiritual, material y financiero ta aumenta.
Ora nos ta biba bon cu otro nos por haci Oracion den union. ( Mateo 18:20).
Desunion den famia ta haci un famia swak, nan por tin hopi placa, hopi propiedad, pero desunion ta debilita tur cos, pasobra nan no por aserca otro.
Corda bon cu e ladron ta bini solamente, pa horta, pa mata y pa destrui, y un di su arma fuerte ta desunion den famia.
Un acto di adulterio, ta un falta di respet den famia, sea na e esposa of esposo, pero e yuinan tambe lo bay den e desunion, ora e mayornan mester divorcia.
Desunion ta pone mucha falta respet pa su mayor, pasobra e no sa ken e tin cu sigi su ordo, pasobra tin desunion entre su mayornan.
Un famia cu no ta uni, no tin direccion, pasobra cada ken ta pa su cuenta, cada ken kier demostra locual cu e por. Pa falta di union den famia hopi biaha nos grandinan ta wordo bandona, of maltrata.
Hopi biaha placa ta trece desunion, tin cu mantene cas di mayor, e yiunan tin placa, pero desunion ta pone cu ningun hende kier saca man , pasobra tur ta pensa cu e otro kier usa su placa.
Desunion den famia, ta trece stress y depresion, y hopi ta bandona nan famia, sin wak atras riba nan responsabilidad, y esey ta causa problema social grandi den nos comunidad.
Ma pa loke ta boso, papia e cosnan cu ta pas pa doctrina sano. Hombernan di edad mester ta modera, digno huicioso,sano de fe,den amor,den perserarancia.
E mesun manera muhenan di edad mester ta reverente den nan comportacion, no calumniado,ni sclavisa na binja,sinjando loke ta bon,pa nan encurasha e muhernan hoben,pa stima nan esposo,pa stima nan yuinan,pa ta huicioso, puro y bon ama di cas, carinjoso sumiso na nan mes esposo,pa e palabra di Dios no wordo deshonra.( Tito 2:1-5).
Nos ta bibando den tempo trabahoso , un tempo caminda tin poco respet, y tiki temor di Dios, caminda malo ta wordo yama bon, y bon ta wordo yama malo, caminda inmoralidad ta broma tur caminda, y scuridad ta aumenta, pero nos tin cu tene cuenta cu locual e palabra di Dios ta bisa con nos tin di comporta, den e tempo aki.
Ta para scirbi den 2 Timoteo 3:10: Ma abo a sigi mi sinjansa, conducta, proposito, fe, pasenshi,amor y perserverancia.
Ta tempo pa mayornan pasa over e bon manera y respet cu nan a ricibi pa nan yuinan y nietonan.
Ta tempo pa union den famia wordo promovi. Sinceramente, Pastor Marcel Balootje
