MetaCorp, e compania mas bieu di Aruba, a obtene su certificacion di sostenibilidad pa medio di e organisacion reconoci mundialmente, Green Globe. Nan ta orguyoso di anuncia cu, no solamente a logra certificacion di Green Globe, pero a haci esaki cu un puntuacion excepcional, poniendo e compania den e porcentahe di mas halto. Ademas, MetaCorp tambe ta e prome compania di su tipo pa obtene e certificacion di Green Globe.
Estableci na aña 1920, pa hopi tempo MetaCorp tabata un campeon di Corporate Social Responsibility (CSR), contribuyendo consistentemente na cambio positivo a traves di asociacionnan comunitario impactante y colaboracionnan sin fin di lucro. MetaCorp tambe a alinea su operacionnan cu e Metanan di Desaroyo Sostenibel (SDGs) di Nacionnan Uni y a crea y establece programanan y actividadnan nobo continuamente.
MetaCorp tabata e prome, y ta un di e unico companianan priva di Aruba cu tin un team estableci di trahadonan social interno cu ta enfoca riba e bienestar di tur empleado, tanto na Aruba como na Corsou.
Separa di esfuersonan interno, MeraCorp tambe ta asocia cu organisacionnan manera Telefon pa Hubentud cu ta impacta e comunidad di mucha, Sonrisa, cu ta impacta esnan cu nesesidadnan special. STEM EMBASSY, cu ta defende y promove descubrimento y conocemento di STEM pa Hubentud di Aruba y Trampolin pa Trabou, cu ta contribui na e particpacion di esnan cu necesidad special den mercado laboral.
Den un esfuerso pa sigui mehora e programa di sostenibilidad, a selecta Green Globe como e partner di escogencia pa certificacion. Green Globe ta existi pa mas di 25 aña y ta un organisacion di certificacion di sostenibilidad reconoci mundialmente. E proceso a encera pa revisa y reimagina e practicanan di negoshi, implementa sistemanan di siguimento, realisa un audit amplio di actividadnan actual a traves di un lens di sostenibilidad y ESG.
“Pa mas di 100 aña, MetaCorp a contribui na crea un impacto positivo den comunidad. Como e compania di mas bieu na Aruba, no ta simplemente un placer, pero un responsabilidad pa yuda unda y ki ora cu por. Nos accionnan cu ta sostene e idea aki, semper a existi. Toch segun cu mundo ta modernisa, terminonan y cuadronan nobo a cambia. Sostenibilidad no ta algo nobo pa nos, pero e tabata un trayecto fascinante door di e proceso di certificacion aki pa mira tur nos accionnan actual documenta haciendo uzo di e cuadro nobo aki, banda di ideanan innovativo, pa haci nos mas sostenibel ainda y pa aumenta e impacto positivo riba nos isla”, tabata palabra di Eddie de Veer, CEO di MetaCorp.
E compania netamente Arubiano ta orguyoso di e logro aki y ta entusiasma pa loke ta bin mas dilanti!
