Cu e articulo aki, mi ta desea di manda tur palabra di condolencia na henter famia di señora Imelda Rustveld y na tur cu a stim’e.
Mi tawatin sigur 8 aña di edad, tempo cu mi a scucha e nomber, scucha e bos y mira Imelda Rustveld su potret riba e caft di un disco Lp na radio 1320 am, VOZ DI ARUBA.
Mi tata Addison Croes (dfm), E bos di Aruba, e tempo ey tawata disfruta di un sintonia respeta den su programa Festival Crioyo, dedica na Aruba su artistanan di canto y tambe algun internacional. Papi, manera mi tawata yama mi tata, tawata transmiti tanto cariño riba mi ora cu e tawata papia di e artista Arubano. E tawata hibami, casi tur siman, radio cu ne y hunto cu Juan Carlos Hill, nos tawata dicidi cua disco di cua cantante tawata tin cu toca. Mi tawata permiti pa bay den studio 2 di Voz di Aruba y baha e Lp-nan abou y hiba algun pa Juan Carlos toca.
Un di e LP-nan, cu nunca mi a lubida, tawata e Lp cu e 10 cantantenan Arubiano di ranchera, cu a representa Aruba, e aña ey na e festival di ranchera Antias, arasando cu tur premio cu por tawatin. Algun cantante cu mi por corda rib’e Lp ey tawata Vale Croes, Yolanda van der Linden, Linda Wolf, Bubu Bislick, Bertha Croes y tambe Imelda Rustveld. Apart cu mi tawata fan grandi di e musica ranchera, danki na mi mama Josefa- y mi tata Addison Croes, di biaha ora mi a wak e potret di Imelda Rustveld compaña pa un fam cu mi a haya sumamente interesante, mi a bira fan. Ora mi a laga Juan Carlos toca e cancion, mi a bira hasta mas fan ainda. E cancion dje Lp ey tawata e famoso cancion La Basurita, interpreta pa eo e cantantenan Mexicano Beatriz Adriana y Maria de Lourdes. La Basurita ta un di e cancionnan clasico di ranchera cu di chikito mi a gusta y scuchando Imelda interpret’e tawata motibo suficiente pa mi pidi Juan Carlos toc’e mas biaha den Festival Crioyo.
Añanan despues mi a bini bek di Hulanda y 8 aña pasa, mi a topa Imelda, su yiu Milly, cu ya tawata un amiga di mi, y nan famia, den un restaurant na Boegoeroei. Aki mi a cera conoci oficialmente cu Imelda y nos a cuminsa papia cu e sa yiu di ken mi ta y cu hasta mi mama tawata den grupo di aguinaldo antes. Imelda y Milly a bisami cu nan lo haya masha leuk si mi yega e siman siguiente nan cas na Cura Cabay y train cu nan grupo di aguinaldo cu yama “Flor di Pasco”. Mi a dicidi di tuma e reto y nos a train y presenta varios luga den temporada di Pasco. Mi a cera conoci tambe cu un grupo di cantantenan maraviyoso cu semper a tratami bon. Mi tawatin e honor di a graba den studio di Diego Henriquez y Danny Koolman, dos cancion, cu ta riba e cd ey. Semper mi lo keda agradecido na Imelda cu cada bes tawata anima nos pa saca e miho di nos. E honor mas grandi tawata ora cu Milly y Imelda a honrami pa ta e padrino di e cd ey, hunto cu Nancy Ramos, cu a bini Aruba for di España na 2016.
E storia por continua, pero mi ta termin’e aki gradiciendo Imelda Rustveld pa tur e cariño y animacion brinda. Pa semper nos lo keda celebra y presenta e bos di oro di Aruba su reina di musica ranchera y aguinaldo den nos programanan navideño na Magic 96.5 fm cu Erin Croes. Pa Erin semper tawata un placer pa tawatin Imelda Rustveld den su programa Na Drempel di Fin di Aña p’e entrevistanan campeon. Esta un dama talentoso cu energia, Imelda tawata.
Danki Imelda, masha danki pa tur cos, forsa na su famia stima, grupo Flor di Pasco, su amigonan y cu Imelda sosega trankil sabiendo cu cu el a laga un bunita stempel cultural y musical atras riba nos tur.
