Recientemente, Michael Lampe a keda oficialmente nombra como Diplomatico Cultural di Aruba, un rol cu Lampe a accepta cu gran honor y sentido di responsabilidad patriotico. E rol di Diplomatico Cultural ta fundamental pa desaroyo integral di nos isla: pa fortifica nos sector cultural, pa conecta cu mundo rond nos, y pa lanta e bos di Aruba riba escenario global cultural.
Diplomacia Cultural ta mas cu arte y expresion; e ta un herment strategico pa promove nos identidad nacional y pa yuda crea un Aruba mas sostenibel. Ta pa esei mes cu Lampe, cu un trayecto largo den e mundo cultural y musical, a dedica su estudio na e tema, investigando con diplomacia cultural por yuda eleva un pueblo. Su “academic paper” riba e tema ta splica cu cultura no ta simplemente decoracion di nos isla, sino e curason y e base pa desaroyo local, un desaroyo cu tin su raiz den nos propio identidad y cu ta conecta cu turismo sostenibel, e sector creativo y desaroyo social.
Gobierno di Aruba, reconociendo e balor strategico di cultura como motor pa progreso, a tuma e decision pa nombra Lampe den e funcion di Diplomatico Cultural. E lo traha na Hulanda, pa representa Aruba na luganan unda cultura ta biba y florece. Hunto cu NGO’s y institutonan relevante, Lampe lo busca sinergia y aliansa, pa pone Aruba riba mapa internacional como un pueblo cu su alma ta cultura.
Michael Lampe ta gradici Prome Minister Mike Eman pa e confiansa poni den dje, pero tambe tur esnan cu durante aña a traha cu pasion pa proteha, preserva y promove e rikesa cultural di Aruba. Aruba ta un pueblo chikito cu un alma grandi y cultura profundamente hancra.
