Oranjestad, 27 juli 2025 – E decision tuma pa e gobierno nobo avp/futuro, unda Minister Dowers a kita tur miembro di e conseho di directiva di Utilities Aruba N.V. y su subsidarionan, WEB, ELMAR, AWSS y ARE, a causa hopi problema dor di varios violacion di reglanan existente.
Varios miembro a wordo kita sin advertensia, sin motibo cla, y simplemente alegando “perdida di confiansa”. Esaki ta contra tur e promesanan di bon gobernacion y tur regla cu e gobierno di Avp/Futuro mes a pone den su regeerakkoord (acuerdo di gobernacion).
Kibra regla y falta di transparencia
Segun documentonan legal conoci pa Solo di Pueblo, gobierno no a duna razon hustificabel pa e retironan masal;
Gobierno no a sigui e proceduranan legal cu ta poni den ley pa kita miembronan di conseho;
Y Gobierno no a respeta e proteccion contractual pa e miembronan di conseho den AWSS y ARE.
Esaki ta un violacion di e standard internacional, manera e OECD Guidelines for State-Owned Enterprises, cual ta bisa cla cu miembronan di conseho por wordo kita solamente pa motibo real y relaciona cu nan trabao y responsabilidad, y no pa motibo politico.
Palabra vs Accion:
Aunke e gobierno nobo a papia hopi fuerte tocante transparencia, merito y un di maneho den empresa publico liber di metemento politico, e decision aki ta mustra hopi hipocrita.
Abogadonan local ta bisa cu esaki ta pone un precedenten peligroso: si por kita miembro asina facil, lo por kibra confiansa di inversionistanan y daña e stabilidad di institucionnan publico.
I awor?
Awor tin un caso cu ta den man di huez. E miembronan di conseho cu a wordo kita ta pidi pa wordo poni bek.
Un abogado renombra di Curacao a tuma e caso y a stel su mes pa tur e miembronan cu a keda afecta.
E caso ta bira hopi intresante, pa pulsa si un minister, (den e caso aki Dowers) por a kita tur miembro di raad van bestuur, sin motibo y just pa politikeria.
Si e huez dicta na fabor di e miembronan di bestuur, esaki lo forsa e gobierno pa sigui regla di bon gobernacion, of riesga mas daño legal.
E caso aki lo sirbi como un test: si e principionan di bon gobernacion ta prevalece, of si interes politico ta domina.
