Awe mainta Hues a dicta sentencia den e caso penal contra e homber V. Fiscal ta haya V. culpabel di a haci actonan inmoral cu un mucha muher y a exigi 3 aña di prison.
SOLO DI PUEBLO por a compronde cu Hues a bisa cu e no ta haya cu tin suficiente prueba y a declara e sospechoso V. liber.
HUES A DECLARA SOSPECHOSO LIBER
Awe mainta den sala di Corte di Husticia, Hues a bisa cu e acusacion di Fiscal contra V. ta cu riba 14 November 2023, V. a abusa y haci actonan inmoral cu e mucha muher T.(15). Hues a duna un splicacion, kico e ta pensa di e caso. Hues a mustra cu segun e denunciante T., e abuso a sosode den un auto den parkinglot di un school. V. a admiti cu e tabata den e auto cu e mucha, kende el a duna un lift, pero a desmenti categoricamente di a haci actonan inmoral.
Hues a sigui bisa cu abogado mr. Kuster a mustra cu den e parkinglot tin hopi auto y hende ta pasa y ta imposibel cu V. ta bay haci actonan inmoral cu e mucha.
Hues tambe a mustra cu abogado a señala cu contrario cu loke Polis bisa, e windshield di e auto no ta getint. E abogado mes a saca potretnan di e auto y a entrega esakinan na Hues y Fiscal den Corte. E abogado cu e potretnan di auto a mustra cu e windshield no ta getint y cu e auto tin sunroof habri cu ta manda claridad den e auto.
Hues a sigui bisa cu Fiscal ta haya V. culpable di actonan inmoral. Fiscal ta basa su mes cu e amiga di T. a bisa cu el a mira V. hopi emocional. Ademas cu T. a declara cu V. a haci actonan inmoral cun’e.
SOSPECHOSO DECLARA LIBER
Hues a bisa cu teniendo cuenta cu e potretnan cu abogado a trece y mirando e postura grandi di V., ta imposibel cu V. por a haci actonan inmoral cu e mucha T.
Hues ta haya cu no tin suficiente prueba. Hues no ta haya legalmente proba e acusacion contra V. y ta declar’e liber.
