Parlamentario Marco Berlis (MEP): Miguel Mansur ta bay live lastra clero Catholico y tur esnan contra su agenda di ideologia di genero
Diadomingo 5 di november ultimo, despues cu Miguel Mansur a ataca publicamente clero Catholico riba Facebook, e la haya ta bon pa continua su racha di atakenan baho contra tur esnan cu ta opone su opinion, agenda y plan di ideologia di genero pa Aruba den su video. E video aki e la pone riba su Facebook, den cual e ta bebiendo un thee of koffie for di un cup bashi. Den e video Miguel ta conta un poco di su infancia y drogadiccion den cual e ta expresa su mes cu hopi emocion pa despues bay riba un racha di guera contra tur esnan cu ta opone contra su opinion.
Pastornan, religionan, tradicionnan y fielnan a wordo ridiculisa y insulta pa Mansur
Den su ultimo video, fuera di a ofende henter iglesia Catholico, a ofende tur Cristian y tur otro denominacion y nan fielnan, cu ta mas o menos 80% di henter e poblacion di nos pais. Mansur ta bay asina leu di tuma e Bijbel, Palabra di Dios, y ta malusa scrituranan sacando esakinan for di contexto, pa hustifica su ponencianan. Miguel Mansur no solamente ta mofa e Palabra di Dios publicamente, e ta abiertamente insinua cu esaki no ta sirbi mas pa un sociedad moderno. Mansur, supuestamente un teologo riba su mesun forsa no ta contento ni di acuerdo cu contenido di Bijbel. Tur hende conoce e pasashi den Bijbel Mateo 4:1-11, den cual Hesus ta wordo tenta pa Satanas. Kico Satanas a usa pa tenta Hesus cu ne? Satanas a usa e mesun Palabra di Dios, pero for di su contexto original, pa purba laga Hesus peca dilanti Tata Dios. Kico Hesus a haci? E la contesta Satanas cu e Palabra di Dios den su contexto corecto. Esaki ta siña nos cu bo flie no ta subi pasobra bo a lesa algun scritura for di contexto pa hustifica bo argumentonan.
Miguel hustificando indoctrinacion di nos yiunan na scol
Tratando na ridiculisa e ponencia di iglesianan di tur denominacion y lidernan den comunidad, Mansur ta procede den e video pa ridiculisa e ponencia di e lidernan religioso riba e indoctrinacion di nos yiunan si material di ideologia di genero ta drenta scolnan. Mansur sa hopi bon con vulnerabel nos yiunan ta ora nan ta chikito. Tin un rason valido pakico un mucha chikito no por haya un rijbewijs, no por core auto, no por vota ainda, no por bai guera, no por bebe alcohol, no por drenta cinema pa wak cierto peliculanan cu ta pa hobennan mas grandi… Anto e pregunta e ora ta: “pakico Mansur ta busca pa pusha material di ideologia di genero pa nos yiunan chikito den nos scolnan?” E derecho di educa nos yiunan mester keda den e mannan di e mayornan. Cualkier politico cu ta pretende di kita e derecho aki di mayornan ta “hol uit” nan derechonan legal. Esaki ta e politica cu Mansur ta introduciendo na nos pais? Acaso no ta su forma dictatorial y arogante a core cu tres politico for di su partido?
E caracter instabiel y comportacion barbaro di Miguel
Mansur ta e ehempel di un politico peligroso, cu problemanan emocional consistente, cu ta papia prome ke pensa, cu ta insulta prome cu e rasona, cu ta lastra, difama y ofende pa gana un argumento. Mansur ta dispuesto pa troce y gaña lo mas sagrado di nos pueblo pa convence su mes y pueblo, cu e tin rason. Miguel ta for di control y a pasa e liña cora di respet y dignidad hopi
tempo caba. Ma ta kico nos por spera di un politico miyonario cu semper a haya tur loke e tabata kier y cu a bati su curpa tur caminda? Miguel su caracter como su arogancia ta un peliger, menasa y bom cu ta wardando pa explota. Esaki te politica nobo cu Miguel a campaña cu ne y a promete pueblo? Pueblo merece politico y lidernan cu tin respet pa pueblo. Politiconan cu ta respeta nan creencia, nan religion, y nan preocupacionan. Ni e caracter ni e agenda di Mansur ta un refleho di esaki.
Si pueblo desea mas informacion di e articulo aki, contact mi na tel: 528-4639 of email mi na: marco.berlis@parlamento.aw / Bo parlamentario y sirbidor di pueblo na bo ordo semper!
