Diaranson merdia den Corte di Husticia a trata e caso cu Mike de Meza, acompaña pa mr. D.Croes y Duijneveld a cuminsa contra Departamento di Impuesto (Gobierno). Esaki ta relaciona cu e carta Inspector di Impuesto cu ta mustra cu de Meza debe belasting y como tal de Meza no por bira Minister.
SOLO DI PUEBLO por a compronde cu de Meza a bisa Hues cu el a paga e debe di Impuesto y ora el a pidi un carta di declaracion liber di impuesto, Departamento di Impuesto a nenga.
CARTA TA MUSTRA CU DE MEZE DEBE IMPUESTO
Hues a mustra cu tin carta di Inspector di Impuesto cu ta cuestiona cu e candidato pa Minister, de Meza, tin debe cu Impuesto. Formador y tambe Minister Presidente a haya e carta aki. Esey a haci cu de Meza no por bira minister.
CUESTIONA CARTA DI IMPUESTO
Duijneveld a cuminsa bisa Hues cu e pregunta ta si Gobierno ta admisibel of no. Duijneveld ta haya cu e Impuesto no por tin efecto riba nombramento di de Meza como minister. El a mustra cu tin hurisprudencia riba esaki. El a bisa cu Formador di Gobierno a bisa cu e kier tin un declaracion liber di Impuesto pa nombramento di de Meza como minister. Na opinion di Duijneveld, tin sentencia di Corte na Hulanda, cu e asunto di Impuesto no mester tin consecuencia pa nombramento di minister. Duijneveld ta haya cu nan demanda contra e carta di declaracion di Impuesto ta na su lugar.
Mr. D.Croes a bisa Hues cu de Meza tabata un exitoso comerciante y despues a drenta politica. Despues di eleccion, de Meza ta e candidato pa bira minister. Formador a pidi investigacion riba de Meza pa credibilidad. E carta di Departamento di Impuesto a pone cu a rechaza pa nombra de Meza. Na opinion di mr. Croes, tin atakenan di social media riba de Meza cu ta tacha su nomber. Den carta 14 April 2025 e director di Impuesto ta informa cu for di investigacion na Maart 2025 no tin ningun debe di de Meza pa cu Impuesto. Tanto Formador, de Meza y abogado di de Meza, a haya informacion cu Departamento di Impuesto no tin ningun demanda di Impuesto contra de Meza. A keda asombra cu Inspector di Impuesto a nenga di duna declaracion liber na de Meza, cu e no debe Belasting.
Mr. Croes a bisa Hues cu de Meza, mescos cu hopi comerciante na Aruba, no a entrega nan papelnan di belasting na tempo. Door di esey bo ta haya boet. El a menciona cu tin un caso di 2009 cu de Meza debe Impuesto. Segun ley, si e ta mas cu 10 aña, e no ta valido mas. E ta haya cu ta politiqueria ta wordo haci den e caso aki. A manda pidi Departamento di Impuesto pa haya e carta liber di Impuesto, pero Departamento di Impuesto a mustra riba un caso di un politico na Curacao cu tabata sentencia pa caso di inmoralidad caminda e no a wordo nombra como Minister. E abogado ta haya incorecto cu ta compara e politico di Curacao cu de Meza.
Mr. Croes a cuestiona e forma con Departamento di Impuesto a atende cu e peticion pa declaracion di belasting.
DEMANDA DI DE MEZA MESTER WORDO RECHAZA
E director di Departamento di Impuesto, señora Gomez-Pieters a representa e Inspector di Belasting. Señora Gomez-Pieters a bisa Hues cu mester rechaza e demanda di de Meza.
Na opinion di señora Gomez-Pieters, no tin base pa Inspector di Impuesto duna declaracion liber di belasting na de Meza. El a splica cu na Maart 2025 a haya peticion di Formador pa haci investigacion di Impuesto riba de Meza. Señora Gomez-Pieters a remarca cu no ta asina cu a manda social media informacion tocante de Meza. E screening di de Meza ta encera diferente investigacion entre otro Impuesto. A constata cu na 2020 y 2021, de Mez y su señora no a entrega papelnan di Impuesto y como tal no por duna declaracion liber di belasting.
Na opinion di señora Gomez-Pieters, de Meza mester a pidi na Ontvanger un carta di declaracion liber y no na Departamento di Impuesto. El a mustra cu 18 April 2025 e carta di declaracion di Inspector di Impuesto a bay Formador, caminda ta mustra cu de Meza tin debe di Impuesto y de Meza no ta di acuerdo cu e contenido di e carta. Señora Gomez-Pieters ta haya cu Formador a haya suficiente informacion pa cu e candidato pa minister. El a bisa cu ta Formador tin cu dicidi riba nombramento di de Meza y no Inspector di Impuesto. Señora Gomez-Pieters ta haya cu mester rechaza e demanda di de Meza pa reevalua e carta di Impuesto di Inspector di Impuesto. E ta haya e interes di de Meza riba su integridad, no tin nada di haci cu e evaluacion di Inspector di Impuesto.
Hues a mustra cu el a haya informacion cu de Meza kier pa reevalua e carta y drecha su integridad. Hues a mustra cu tabatin intercambio di cartanan y tin un parti di e debe di Impuesto paga. Ta asina cu Minister Presidente a bisa de Meza cu el a haya un carta cu no ta positivo riba asunto Impuesto y no por sigui e procedura pa de Meza bira minister. El a bisa de Meza busca un reevaluacion di Inspector di Impuesto pa asina por sigui cu e procedura.
EXIGENCIANAN PISA PA BIRA MINISTER
Hues a puntra e director di Departamento di Impuesto, con mester mira si de Meza a paga un parti di e debe di belasting y no tin mester di paga mas, con Departamento di Impuesto lo a trata un hende normal? E otro hende si lo haya un reevaluacion? E director di Departamento di Impuesto a bisa Hues cu tur hende ta wordo trata igual. Hues a remarca, pakico ora de Meza a paga y a pidi un carta cu el a cumpli, Departamento di Impuesto ta haci fastioso cu no por duna e carta ey. Director di Departamento di Impuesto a bisa Hues cu segun e ley di Impuesto (LIM) tin diferente peticion. Ora ta trata di peticion pa entre otro pa nombramento di un minister, un comerciante, e ta otro compara cu un hende normal. Señora Gomez-Pieters a bisa Hues cu nan mester atene na e ley (LIM).
De Meza a bisa Hues cu el a paga tur su debe y a pidi Departamento di Impuesto un carta cu el a cumpli pa asina entrega e carta na Minister Presidente y tambe pa e mes como politico, pa e por demostra cu e no a keda sin paga belasting.
Hues a bisa cu e ta bay evalua e caso y dia 4 Juni 2025 lo tin un decision.
