Ladronicia den RDA no por bay impune
Ta yega ora p’e caso cuminza lora..
E mal maneho cu a sosode den RDA, unda entre otro a gasta 99 mil florin pa traha un video, dor di e compania di Candy y Donny Rasmijn, no por keda impune.
Tabata na aña 2015 cu 2016 ora cu Gobierno a haya e yabi di refineria for di Valero, esaki a pasa pa RDA y e momento ey CITGO a tuma over e refineria y a haci varios pago na RDA como huur di refineria.
E pagonan aki a drenta den caha di RDA, pero na mes momento a tuma lugar un maneho hopi robes dor di Mike de Meza, unda e tabata instrui y duna ordo pa haci cosnan, paga recibonan, etc. etc.
Tur campañador di Mike de Meza a wordo hinca den RDA, di secretaria, amiga, amigo etc. etc.
Dje forma aki, hopi persona liga na AVP a abusa di e situacion, unda placa tabata sali na granel.
Den tur e mal gastamento di placa, Candy Rasmijn a cobra pa traha un video, 99 mil florin, cu den nos humilde opinion, no ta nada otro cu hortamento di placa di pais Aruba.
Ningun video por costa 99 mil florin. Compania di Patrick Paskel no a keda atras y tambe a abusa di e situacion, cobrando miles y miles di florin pa tur sorti coy loco.
Projecto di Algen ta otro ladronicia den dia cla, unda cu a horta mas di 4 miyon florin, sin logra nada. Aki tabata un handje vol di empleadonan y amigonan cu a tabata yuda otro.
No tabatin ningun documentacion y despues a bin resulta cu tur cos a bay telefonicamente.
Mas cu claro, Mike de Meza muy pronto lo mester asumi su responsabilidad, pasobra e ta e proximo minister di Gabinete Mike Eman cu lo wordo denomina como sospechoso di husticia y mester bay rindi cuenta di e fechoria cu a tuma lugar.
Ta haci un yamada fuerte na Ministerio Publico, pa cuminza atende cu e robo aki.
