Decenas di miles di granhero a drenta e capital Indio drentando den e compleho historico Forti di Delhi memey di protesta contra e reforma agricola cu ta menasa e fuente di ingreso di centenares di miyones di persona.
Riba cabay of coriendo tractor, e trahadonan agricola cu bandera, herment of spada den man, ta desmonta e baricadanan di polis, despehando caminda pa e curason di New Delhi.
Medionan local ta informa cu a suspende Internet den partinan di e ciudad riba orden di Gobierno y olis, cu ta forsando pa tuma bek e control riba e situacion.
E ministerio di interior tambe a corta internet na Singhu, un bario nort di e capital unda cu miles di agricultor tin dos luna ta campa.
Varios grupo di manifestante a uza grua y tractor pa distrui e baricadanan diamars ora cu a celebra Dia di e Republica, cu ta conmemora e adopcion di e Constitucion di 1950.
Polis antidisturbio a manda gas lagrimogeno pero mester a hala atras ora cu nan a wordo supera den cantidad.
E murayanan di e Forti Cora, ocupa pa e manifestantenan, ta acoge regularmente e mensahenan na e nacion di e prome minister Narendra Modi.
“Modi lo scucha nos, e mester scucha nos awo,” Sujdev Singh, un granhero di 55 aña di e estado norteño di Punyab a declara.
E productornan chikito ta kere cu e regulacionnan gubernamental nobo ta perhudica nan posicion riba mercado, faboreciendo competidornan mayor y menasando cu altera un gran parti di e economia.
Nuebe buelta di negociacion cu sindicatonan agricola no a logra calma e protestanan y aunke Gobierno a ofrece pa para e reforma 18 luna, e agricultornan ta demanda pa revoca esaki completo.
Ainda no ta conoce e cantidad di aresto of hende herida, pero television estatal a mustra varios imagen di manifestantenan na sanger.
Rond di e mita di e poblacion Indio (1.300 miyon di persona) ta traha den e sector agricola.
