BCI lo resorta awo bow Ministerio di Husticia y yuda controla ley di animalnan domestico
ORANJESTAD, Aruba – 25 di februari 2021: Durante un bishita orientativo e siman aki na Bureau City Inspector, situa den e mesun edificio di Serlimar na Pos Chikito, minister mr. Andin Bikker a topa cu e empleadonan, a scucha nan y a informa nan di e cambionan, den cual e departamento conforme decision reciente di Conseho di Minister lo resorta bou di Ministerio di Husticia. Cu esey tin plannan concreto pa percura pa mas autoridad pa e City Inspectornan, den cuadro di nan trabou di controla y sanciona fayo, y asina yuda tene nos barionan limpi y cuida nos medio ambiente.
A informa e trahadonan di e decision pa atrae un director interino nobo, Roy Lacle, pa reenforsa e ekipo. Sr. Lacle tin un experiencia amplio como polis y hulp-officier van justitie.
E trahadonan di nan banda a vocifera nan pensamentonan, a ripiti peticionnan haci den pasado, y a duna idea con pa mehora servicio na comunidad y pa ta un parti integral den control pa mantene nos isla limpi. Den e cuadro ey nan a indica di ta carece di cierto material di trabow y tambe di mas autoridad pa por sanciona esunnan cu ta faya. Minister a mustra comprension pa nan preocupacionnan y mustra cu prioridad di Ministerio di Husticia y Gabinete Wever-Croes ta pa percura pa tur departamento haya ekiponan necesario pa traha. Ya tin varios ekipo na caminda pa por amplia e tareanan di BCI cu control di e ley di animalnan domestico. El a constata cu Bureau City Inspector a cana un caminda largo, pero cu no a yega ainda na unda mester ta y ta su intencion pa yuda impulsa e departamento na un nivel nobo di excelencia.
E mandatario a garantisa BCI cu bou su maneho lo hiba e departamento den un dimension nobo, cu un vision pa futuro, pero sigur cu mas “handhavingsbevoegdheden” pa por traha cu mas autoridad.
Conseho di Minister a tuma un decision dia 12 di november 2010 mirando e necesidad pa tin un instancia pa controla tur locual ta regarda medio ambiente riba nos isla. A concretisa e decision den un decreto riba dia 6 di september 2011 y asina a funda e departamento oficialmente na aña 2012 cu e meta pa desaroya actividadnan pa promove un forma di biba sano, saludabel y limpi den bario y districtonan. Ta combati comportacion cu ta afecta e calidad di nos forma di biba y participacion na medio ambiente. E City Inspectornan ta patruya na diferente luganan, ta suministra informacion pa conscientisa Pueblo pa mantene areanan y barionan limpi, ta controla riba cumplimento di leynan di medio ambiente y tuma paso huridico si ta necesario. Ta tuma keho di pueblo y ta traha riba nan buscando solucion duradero.
Awendia Bureau City Inspector ta conta cu 12 empleado, di cual 8 ta City Inspectors cu ta subi caya tur dia pa garantisa cu tur hende ta atene nan mes na reglanan di medio ambiente. Unda nota fayo ta actua y den caso cu mester, ta envolvi Serlimar y DOW pa duna un man den haci areanan limpi atrobe.
