Minister Andin Bikker: Lo start proyecto piloto cu prueba di seguro di auto digital

0
178

Riba proposicion di minister di husticia mr. Andin Bikker, Conseho di Minister a bay di acuerdo pa introduci, den cooperacion cu companianan di seguro, un proyecto piloto pa acepta prueba di seguro di auto den forma digital, esta via un app riba telefon celular. Esaki lo encera cu polis lo acepta prueba di seguro di auto valido riba e app di telefon proporciona dor di companianan di seguro reconoci. Esaki por ehempel ora di un control di polis, den cual ta pidi pa rijbewijs, prueba di seguro, di pago di impuesto y cu e auto ta gekeur. Ya caba minister Andin Bikker a anuncia recientemente cu lo modernisa e rijbewijs di tal forma cu esey tambe pronto ta bay den un app, den cual via bo celular por demostra cu bo tin un rijbewijs valido. E simannan nos dilianti lo cera un protocol cu companianan di seguro concerni, den cual lo fiha entre otro un fecha pa bay start cu e proyecto piloto. 

Minister Andin Bikker ta gradici e companianan di seguro pa e iniciativa innovativo aki y tur instancia cu a dedica atencion pa e proyecto piloto di prueba di seguro di auto pa medio digital por bira un realidad, manera por ehempel Cuerpo Policial Aruba, Ministerio Publico y Departamento di Impuesto Aruba.

LEAVE A REPLY

Please enter your comment!
Please enter your name here