Dialuna a tuma luga un conferencia di prensa den cual Gabinete AVP-Futuro a reflexiona riba e prome 100 dianan di gobernacion. Cu e acuerdo di gobernacion solido como e base pa un cooperacion di respet mutuo y confiansa entre AVP y Futuro, 101 dia pasa 6 minister a huramenta dilanti Gobernador. Hunto como Gabinete AVP-Futuro a opta pa un estilo di politica habri, transparente y inclusivo, caminda dialogo structural cu actornan clave den nos comunidad ta forma e base pa crea maneho cu ta dirigi riba desaroyo comparti.
Minister di Husticia mr. drs. Arthur Dowers a demostra un liderato firme y visionario pa fortifica e cadena di husticia na Aruba, proteha nos comunidad, y crea un isla unda siguridad ta un derecho pa tur.
Un di e prioridadnan di Minister Dowers ta pa combati criminalidad y garantisa un ambiente sigur, tanto pa nos localnan como pa tur bishitantenan cu ta bin Aruba. Cu disciplina y determinacion, Minister Dowers ta trahando cu pasonan concreto pa logra siguridad pa comunidad.
E cadena di husticia mester ta solido pa por enfrenta cualkier reto, y pa duna tur hende un sentido real di seguridad. Minister Dowers su trabao ta refleha un gobierno cu ta scucha e bos di pueblo, y cu ta actua cu determinacion. Hunto cu demas colega ministernan, Minister Dowers ta pone e fundeshi pa un Aruba cu ta mas sigur, fuerte y mas husto pa tur hende.
