Minister Bikker ta evaluando un ‘test case’ contra Hulanda riba condicionnan imponi unilateralmente
Lo busca forma huridico y lo subraya cu nos ta biba den estado di derecho cual tambe ta conta pa pais Hulanda.
Dialuna mainta durante un rueda di prensa Minister Andin Bikker a bisa cu pais Aruba ta evaluando hunto cu su coleganan un test case contra Hulanda pa e condicionnan imponi pa duna Aruba un prestamo. E condicionnan imponi ta empugna cu Constitucion.
Minister Bikker a sigui bisa cu a cuminsa pa menciona cu e diferencianan di opinion entre Aruba y Hulanda riba e tema aki ta hopi grandi. Esaki ta relaciona cu e condicionnan poni pa e sosten financiero esta di tres tranche pa enfrenta e consecuencianan cu e crisis di coronavirus a trece cu ne. Den e fase aki a bini cu diferente condicion cu Aruba ta sinti ta mishi cu autonomia di e isla, no ta necesario y cu ta bay en pugna cu principionan huridico ancra den Aruba su Constitucion.
“Nos ta studiando na ki forma internacional of den Reino por busca nos derechonan. Ta atachando e principionan di nos Statuut y Constitucion, siendo cu nos ta bibando den un estado di derecho. Den un estado di derecho tanto e ciudadanonan como e institutonan mester respeta esaki. Ta papia cu pa Rijkswet mester yega na consensus, aworaki practicamente ta obliga, forsa un pais, y haciendo mal uzo di circunstancianan existente pa bay di acuerdo pasobra nos ta den un situacion financiero hopi precario.”
Bikker a bisa cu pa diahuebs awor por duna mas informacion, ya cu ainda ta haciendo investigacion. “ E cos aki nos no por laga pasa sin mas.”
