E conferencia di International Labour Organization (ILO) ta trece lider nan di gobierno di tur parti mundo hunto pa delibera riba con pa promove husticia social y mehora e posicion di nos empleadonan. Durante e di shentidiestres edicion di e conferencia di ILO, Minister mr. Wendrick Cicilia y director general, Kaatee a probecha e momento pa intrecambia pensamento rib’e vision y maneho p’e sector laboral.
Minister Cicilia a capitalisa rib’e momento pa combersa cu director general, Stan Kaatee y splic’e tocante e ehecucion di e ‘landenpakket’, e intencion pa colabora cu ‘Nederlandse Arbeidsinspectie’ p’asina mehora e supervision pa cu cumplimento cu e leynan laboral, e posicion di esunnan cu ta traha p’un ‘uitzendbureau’ y e importancia di mantene e relacion cu e organisacionnan internacional cu ta ofrece nos posibilidad pa diferente guia, asistencia tecnico y e tratadonan cu ta proteha nos trahadonan contra abuso laboral.
E director general, a expresa cu e ta honra di por a intercambia pensamento cu Minister mr. Wendrick Cicilia. E minister di labor tabata presente pa representa Reino Hulandas mirando cu n’e momentonan aki no tin un minister di labor activo na Hulanda. P’e edicion aki di ILO, no a conta cu presencia di e ministernan di labor di Corsou y tampoco St. Maarten.
Apart cu a brinda Minister Cicilia un calurosamente bonbini na su yegada, e diplomatico Hulandes a expresa n’e mandatario cu di parti e representante permante di Reino Hulandes na ILO Geneve, por conta cu sosten disponibel pa asisti Aruba cu relacion cu maneho y tratado nan cu ta promove husticia social.
Na nomber di Gobierno di Aruba, Minister Cicilia a expresa n’e delegacion di Reino Hulandes cu: “Aruba is ook onderdeel van het Koninkrijk en we koesteren ons relatie binnen het Koninkrijk en ons internationaal relaties, vandaar dat ik namens de Regering van Aruba aanwezig ben. Ik doe een beroep op het Koninkrijk delegatie om tevens op te komen voor de belangen van Aruba en ons te ondersteunen bij aanvragen van technische bijstand”. Despues di e declaracion elocuento di Minister Cicilia, e representantenan permanente di Reino Hulandes a responde bisando: “We zijn er voor jullie”.
Minister Cicilia a keda satisfecho cu e participacion na e conferencia di ILO. E liña di maneho di Minister Cicilia ta pa enfoca riba fortifica e posicion legal, financiero y social di nos empleadonan p’asina trabou ta catalisado di un miho calidad di bida pa e empleado y su famia.
