Minister di Turismo, Transporte y Labor, mr. Wendrick Cicilia, a ricibi Jan Bos, experto den aviacion cu ta traha pa e Royal Netherlands Aerospace Centre (NLR). Durante e encuentro, a papia riba e potencial di Aruba pa posiciona su mes como pionero den e desaroyo di vuelo electrico.
Minister Cicilia a expresa cu Aruba tin e oportunidad pa lidera innovacion den aviacion sostenibel, reduciendo emision di gas cu tin impacto negativo riba clima. Segun e minister, e transicion pa vuelo electrico no solamente contribui na e lucha global contra cambio climatico, sino tambe ta habri caminda pa desaroyo tecnologico y economico pa e isla.
Aruba como “living lab” pa innovacion
Den e reunion, a destaca cu Aruba tin e condicionnan ideal pa funciona como un “living lab” pa experimenta cu vuelo electrico. E proximidad entre e isla nan ABC, combina cu e posibilidad pa produci energia di solo, ta crea un ambiente unico pa test y desaroya e tecnologia aki.
Minister Cicilia a enfatisa cu e vision ta pa Aruba no solamente adopta e innovacion, sino tambe construi conocemento local cu despues por expande (“upscale”) na otro mercado.
Base den investigacion existente
Un investigacion conduci pa NACO na 2021 ya a indica cu e isla nan ABC ta altamente apto pa e tipo di desaroyo aki. E estudio a resalta e distancia cortico entre e islanan, flexibilidad operacional y acceso na energia renobabel como factornan clave pa bira un “test case” ideal den aviacion electrico.
Oportunidad pa colaboracion den Reino Hulandes
E desaroyo politico di Hulanda, incluyendo e regreso di Rob Jetten como Minister Presidente, por habri porta pa colaboracion strategico. Anteriormente, Jetten a asigna 200 miyon florin den e “Groeifonds”, di cual 60 miyon tabata destina pa Aruba. Segun Minister Cicilia, esaki por representa un oportunidad concreto pa financia proyectonan di vuelo electrico.
Minister Wendrick Cicilia tin intencion pa inicia dialogo adicional na mei di e aña aki pa explora e posibilidadnan di cooperacion den e area aki.
Mirando pa futuro
Minister Cicilia a confirma cu Aruba ta sigui explora e posibilidadnan pa posiciona su mes como lider den aviacion sostenibel. E vision ta cla: transforma Aruba den un centro di innovacion caminda sostenibilidad, tecnologia y conectividad ta bin hunto.
