Diaranson mainta a continua cu e reunionnan di PAMAC 2025 na Aruba. Tabatin un reunion general entre e ehecutivonan di e industria di crucero. P’e ocasion aki, Minister di Turismo, mr. Wendrick Cicilia a hiba un discurso masha elocuente n’e topnan di e industria.
E mandatario a inicia bisando cu e ta sumamente orguyoso pa ta presente n’e conferencia di PAMAC. E ta inspira di mira e tantisimo interes di e sector pa tin un compromiso cu pais Aruba. E industria intencionalmente ta scoge pa tin un relacion di trabou cu nos. A hiba varios combersacion durante e ultimo dianan tras di lomba.
Locual cu e minister por resumi entre e serie di combersacion- y reunionnan, ta cu: e ‘stakeholders’ ta considera Aruba como un partner strategico y importante. Nan ta hasta categorisa nos como un miembro di famia.
E industria di turismo crucero a contribui grandemente n’e desaroyo di pais. Aruba a ricibi su prome experencia di crucero cu e linea Voyager cu su barco Libertardor sigui pa Tradewinds djey pa Santa Rosa y Santa Paola, tur esaki den e decada di 1950.
Awendia Aruba ta traha di cerca cu e lineanan crucero mas top di mundo. E industria a trancendi den un oportunidad comercial pa nos hendenan y esey ta algo cu mester balora tur dia, Minister Cicilia a expresa.
Nos a compronde e tarea pa cu e compromiso. Ora un barco crucero yega Aruba, e ta cambia bida di hopi hende. For di e comerciantenan na Welcome Plaza, pa e ‘tour guides’, taxista, restaurant, e tiendanan den Caya Grandi y mas, tur ta sinti e efecto directamente. Pa un periodo tabatin discusion cu Florida-Caribbean Cruise Association (FCCA). Pero a compronde e mensahe y a haci caso tambe. A implenta varios proyecto grandi, entre nan e proyecto di tram, parkeerplaat pa nos ‘tour guides’ y sin lubida e renobacion completo di nos centro di ciudad.
Como parti di e gobierno nobo, ta e vision pa sigui desaroya Aruba como un destinacion pa satisface e necesidadnan di e industria di crucero. A ricibi varios inspiracion durante e ultimo dianan, no obstante cu Gabinete AVP-FUTURO tin apenas tres luna den funcion, ya ta trahando pa sigui desaroya nos centro di ciudad. A cuminsa cu eventonan caminda ta integra turismo cu nos comunidad, manera Ban Bek Caya, pero sin lubida Wilhelminastraat cu tambe lo continua di ta un caya cu desaroyo importante pa e vision di nos di centro di ciudad den su totalidad
A adopta e modelo di un turismo sostenibel, e vision ta p’e sinergia continua tambe cu e industria di crucero. “Nos ta reconfirma nos compromiso cu e industria di crucero. Nos lo sigui inverti den eleva e producto Aruba”, asina Minister di Turismo Wendrick Cicilia a termina bisando.
