ORANJESTAD – Den cuadro di e termino nobo di Gabinete Wever-Croes 2 dialuna atardi Minister di Turismo sr. Dangui Oduber a reuni cu e CEO di APA sr. Marc Figaroa. Esaki ta pa cuminsa mesora cu trabounan pa sigui recuperacion di nos Turismo y comparti e maneho y vision caminda cu e minister kier mira APA den siguente 4 añanan di gobernacion. Minister Oduber a duna di conoce cu Aruba Ports Authority ta un di e entidadnan cu tin e potencial di mas grandi pa locual ta desaroyo economico di nos pais.
Ta hopi importante pa menciona cu APA ta encarga cu e proyecto di “Port City” cu tin un inversion di 500 miyon dollar cu ta wordo financia pa sector priva. E mandatario a sigui bisa cu e proyecto di “Port City’ ta un proyecto cu den Gabinete Wever-Croes 1 a traha extensamente iba dje caminda a reuni cu diferente “stakeholders”, a reuni tambe cu e comision fijo di turismo di Parlamento y a presenta e proyecto na comunidad y gremionan. E proyecto aki sigur lo bay crea oportunidadnan nobo, lo bay crea cuponan di trabou y lo bay trece mas placa pa e caha di Gobierno.
Pesey minister Dangui Oduber ta convenci cu e proyecto aki lo bira e proyecto pa futuro di pais Aruba. pa es motibo e proyecto aki tin e prioridad serca e mandatario pa e wordo ehecuta y cuminsa mesora. Minister Oduber ta contento cu gerencia di APA cu ministerio di turismo ta riba e mesun liña di pensamento. E mandatario a sigui bisa cu ainda falta cooperacion for di ministerio di infrastructura den e caso aki DIP tin algun trabou aina cu mester wordo haci. E mandatario ta confia cu minister engarga cu infrastuctura cu ta nos Prome Minister lo duna tur cooperacion necesario pa e proyecto aki wordo ehecuta. Minister Oduber e bisa cu pa e ultimo añanan e cooperacion entre DIP y ministerio di turismo no a cana manera mester ta pero e ta sigur cu e Gobernacion aki si cos nan lo cana bon.
Otro aspecto cu tambe ta importante pa APA ta e cantiad di bishitantenan cu Aruba ta ricibi for di barco crusero. Esaki ta forma un parti instrumental di nos turismo, turismo crusero ta genera entrada pa APA como tambe pa e taxistanan, tour operators, restaurantnan y tiendanan. E mandataio a splica cu turismo crusero tin un impacto grandi riba nos economia y den cuadro di esaki e mandatario kier mira e cifranan yega na e nivel di aña 2019.
Banda di esaki a discuti oportunidadnan nobo, esaki riba e tereno di APA na e waf di Barcadera. Aki lo bay diversifica nos economia door di haci esaki un centro di distribuimento. Segun e mandatario ya caba a hiba discucion riba esaki, awor den e periodo nobo di gobernacion lo bay dedica mas tempo riba esaki. Tambe e mandatario a menciona cu tin servicio maritimo cu por wordo haci riba e terenonan di APA. Minister Oduber ta mira APA cu un potencial enorme, e ta instrumental pa tur e desaroyonan economico cu ta na caminda.
E reunion aki tawata uno fructifero y a palabra cu den e proximo simannan APA lo bay presenta pa prome biaha den historia un masterplan y esaki ta den bon cooperacion cu ministerio di turismo. Minister Dangui Oduber ta hopi satisfecho CEO di APA a menciona cu tin un masterplan. Asina cu APA ta cla pa presenta esaki na Board di APA conhuntamente cu ministerio por percura pa ehecucion di e masterplan. Minister ta sigura cu APA tin un futuro briyante y su persona ta contento cu e relacion di trabou y ta satisfecho con APA ta wordo maneha.
