Diabierna 4 di maart Minister Dangui Oduber tabata den conferencia di prensa caminda e la lansa e campaña “Sa Bo Number” riba dia mundial di obesidad (“World Obesity Day”). Esaki ta un dia pa refleha riba obesidad cu ta un problema global cu ta afecta hopi hende na Aruba y rond mundo. E aña aki mundialmente e mensahe importante ta “Everybody needs to act – Tur hende mester actua”. Esaki ta netamente locual nos gobernatenan a haci tambe, Departamento di Salud Publico conhunto cu Ibisa a re-inicia un campaña “Sa bo numbernan”.
Minister Oduber a splica cu e programa aki ta parti di su maneho di Salud Publico cu ta basa riba prevencion. Tambe e ta parti di e Plan Nacional di Prevencion di malesanan NCD’s cu ta wordo realisa door di e stuurgroep cu ta consisti di diferente stakeholders conhuntamente cu PAHO. Ministerio di Salud Publico sa cu e causa di obesidad ta hopi compleho y pa logra un cambio y solucion nos lo mester traha consistente riba consientisacion, educacion y actua hunto pa logra esaki. E meta ta pa a largo plaso reduci e gastonan di AZV door di prevencion.
Minister Oduber a splica cu obesidad por afecta bo salud fisico, mental y emocional. Esaki ta sin lubida di e consecuencianan cu e ta trece cune. Malesanan mas grave cu obesidad por causa na un persona, por ehempel diabetis, cholesterol halto y problema cu curason. Pesey den e campaña aki kier enfatisa e comunidad pa tuma iniciativa y nan responsabilidad social, pa midi nan cintura regularmente na cas. Minister a menciona cu ta hopi importante pa educa nos mes den area di movecion, nutricion y yuda otro nan tambe den e oportunidad di por biba un bida mas saludabel. Pa facilita e comunidad y duna asistencia di con pa midi bo BMI y/of haya informacion, DVG a pone un calculator di BMI riba nan website.
E programa aki a wordo realisa danki na e bon cooperacion cu tin entre Ministerio di Salud Publico y Ministerio di Deporte, un danki special na e team di DVG y Ibisa cu a haci esaki posibel. Minister Dangui Oduber ta pidi comunidad pa activa y demonstra na bo ser keri cu esaki ta importante y pa asina hunto traha pa caba cu e stigma rondonando e tema aki.
Na final e mandatario a wordo demostra con pa tuma su midi y pa e sa su number.
