Diahuebs atardi minister di Turismo tabata presente na Gloria caminda a tuma lugar un rueda di prensa conhuntamente cu ATA y Qredits Aruba. Esaki tabata relaciona cu e lansamento di e programa “Aruba Signature Experiences”.

Awendia e biaheronan ta busca momentonan special cu ta cumpli cu nan deseo di tin experencianan unico y genuine cu ta complimenta ken nan ta y esey ta locual e programa di “Aruba Signature Experiences” ta basa riba dje. E mandatario a menciona cu e tipo di turismo aki ta yama turismo niche cu ta birando dia pa dia mas popular y e desaroya aki ta parti tambe di Aruba su norma economico nobo.

Pa cumpli cu e necesidad aki ATA lo ta trahando hunto cu Qredits Aruba y EPI pa asina desaroya y implementa e un programa completamente nobo asina e mandatario a trece dilanti. E programa di Aruba lo tin obhetivo pa destaca y promove experencia nan nobo den romance, bienestar y aventura den e tipo di turismo menciona, e mandatario ta splica.

Minister Oduber a sigura cu esaki ta forma un parti integral di e normanan y/of prioridadnan cu lo tin den su maneho den e segundo termino cu a caba di cuminsa. Cual ta nifica cu lo bay enfoca riba e perfil di turista di “High Value Low Impact Tourism”, e planes di desaroyo di destinacionnan tambe lo bay refleha esaki. Esaki nan ta e turistanan cu ta gana mas di 150 mil dollar pa aña y alaves ta respeta nos naturalesa y balornan cultural.

Pa es motibo ta importante pa Aruba cu actionnan nobo y concreto, sigui bin cu deasaroyo y inovacion mientras cu Aruba ta sigui ofrece su bunita experencianan mediante su producto y servicionan. E programa di “Aruba Signature Experiences” ta un ehempel claro di e action concreto aki, asina e mandatario a trece dilanti.

Minister ta reconoce cu mester bay pone mas atencion riba con lo mester bay eleva e producto y servicionan pa asina na por cumpli cu e demanda cu e modelo di turismo niche lo bay exigi. E mandatario ta mira esaki posibel atraves di duna trainingnan y educa nos negoshinan local, aplica regla y regulacionnan. Lo por introduci un licencia special of via un ROPV pa menciona algun ehempel, lo bay pone mas atencion riba e calidad di e producto Aruba manera cu e ta actual pa evita cu lo por sosode practicanan indesea. Pa di e forma aki yega na e meta final, pa Aruba desaroya e experencia turistico integral.

Finalmente Minister Dangui Oduber a expresa cu Ministerio di Turismo para firma tras di e collaboracion haci entre ATA y Qredits cu no solamente lo provee educacion y guia. Pero atraves di Qredits su experisio y financiamento lo bay realisa e introduccion di negoshinan estilo niche na Aruba.

Minister Oduber ta convenci cu e maneho di high impact low volume lo beneficia communidad.

LEAVE A REPLY

Please enter your comment!
Please enter your name here