ORANJESTAD – Minister di salubridad Publico Sr. Dangui Oduber ta anuncia cu den cuadro di nos Campaña Nacional di Vacunacion, diasabra y diadomingo awo dia 11 y 12 di september, Aruba lo realisa e di 4 VACUNATHON! E Vacunathon ta pa aplicacion di e prome dosis di e vacuna y tambe e di dos dosis si a haya e prome 3 siman anterior.

E meta di e dos dianan aki ta pa logra vacuna mastanto ciudadano contra COVID-19 posibel. Vacunacion ta un acto di solidaridad y reponsabilidad conhunto. Niun hende por keda atras! Tur persona mester wordo proteha, sea door di tuma e vacuna nan mes of door di e comunidad ora di logra e inmunidad colectivo.

Tur menor di edad di 12 pa 17 aña ta haya e vacuna di Pfizer y mester ta acompaña pa un mayor pa ricibi nan prome vacuna. E vacuna di Johnson & Johnson tambe ta un opcion pero tene na cuenta cu esaki no ta wordo duna na menornan di edad y tampoco na personanan ta na estado.

Personan cu no tin AZV y por prueba cu nan ta biba na Aruba pa mas cu 6 luna tambe ta bin na remarca pa haya e vacuna no obstante nan estado legal. E persona na aki mester presenta cu nan passpoort of un contract di trabou.

Mirando e desaroyo cu ta tumando lugar cu e virus di COVID-19 caminda a keda comproba cu e variantenan cu tin y principalmente e variante Delta, ta afectando e personanan mas jong. Gobierno a dicidi pa cambia e enfoke riba e grupo di 12 pa 60 aña mirando cu ya caba a vacuna mas di 82 % di esnan riba 60 aña. Pesey diasabra y diadomingo awo dia 11 y 12 di september ta haci un yamada na henter e comunidad y principalmente esnan entre 12 y 60 aña pa bin na e localidad di prik pa vacuna.

E localidad nan di prik ta: Den e ballroom di Ritz-Carlton hotel for di 9or am pa 4or pm ‘NON STOP’.  E vacuna ta duna e resultado cu nos ta buscando. 

Nos ta warda bo cu bo carchi di AZV of e Aruba Health app!

LEAVE A REPLY

Please enter your comment!
Please enter your name here