Na aña 1980, Nacionnan Uni a decreta e fecha di 27 di september como “Dia mundial di turismo”. E motibo tras di esaki ta pa conscientisa comunidadnan di e importancia di e efecto cu turismo tin riba sociedad, economia, situacion financiero, aspectonan social y cultural. Pesey tambe Nacionnan Uni a decreta e dia aki como Dia mundial di Turismo.
“Naturalmente pa nos tambe ta importante pa celebra e dia aki considerando e importancia cu turismo tin pa henter nos economia y nos pais”, asina Minister di Turismo y Salud Publico, Dangui Oduber, a bisa awe relaciona cu celebracion di e dia special aki. E mandatario ta contento di por encabesa tur e esfuersonan pa crece nos turismo bek, den e di dos termino aki di Gabinete Wever-Croes II. Den e prome gabinete aki a logra crecemento, te na momento cu e pandemia a asota nos isla na maart 2020. Asina mes, cu trabou duro y conhunto, combinando esfuerso na e banda di salud publico banda di turismo, a haci cu nos isla a “bounce back” mas fuerte cu mayoria destinacion na mundo!
Tur aña riba Dia mundial di turismo ta scoge un tema. E aña aki ta enfoca riba crecemento inclusivo. Esaki kiermen cu mester reparti tur e beneficionan cu e crecemento di turismo y economia ta trece cu ne, di forma husto den sociedad. “Nos mester crea oportunidadnan igual pa tur esunnan cu ta beneficia di nos turismo”, segun Minister Dangui Oduber a vocifera, argumentando cu e bolo ta grandi y tin espacio pa nos tur come un tiki di dje.
Aruba sigur no tabatin un aña facil den 2020. As a matter fact, tabata un di e añanan di mas dificil den historia di nos pais, na momento cu a confronta cu e pandemia. Aruba a bay den un lockdown. Tur hende na Aruba a sinti e consecuencianan y efectonan di tin un bida sin turismo y sin entrada. Tabata un situacion hopi dificil cu a duna nos un set back di 30 aña.
“Pero nos ta hopi contento di por a demostra cu nos ta un pais hopi resiliente di e manera con nos ta recuperando nos turismo. Nos a cuminsa e recuperacion caba den luna di juli 2020 y nos ta satisfecho con esaki ta bayendo. Si tur cos sigui segun e proyeccionnan, ya caba otro aña nos lo por recupera 100% di nos turismo den comparacion cu aña 2019”, asina Minister Dangui Oduber a expresa.
“Mi ta kere awe, riba dia mundial di turismo, ta importante pa nos para keto un rato, reflexiona riba e importancia cu turismo tin pa cada un di nos cu ta biba riba e pais aki. Awe sigur mi kier a gradici y felicita tur esunnan cu ta traha e industria aki. Gradici tur e companianan cu ta brinda servicio na nos turistanan, manera ta reconoce nos como un one happy island. Y tambe, mas cu claro, gradici y felicita tur nos partnernan cu ta percura pa nos tin un turismo solido y duradero.”
E mandatario encarga cu maneho di turismo tabatin palabra di felicitacion y alabes gradicimento na Aruba Tourism Authority (ATA), Aruba Ports Authority (APA), Aruba Airport Authority (AAA), Aruba Hotel and Tourism Association (AHATA) y tambe Aruba Time Share Association (ATSA) pa tur nan trabou cu nan ta bin ta haciendo pa nos percura cu nos tin un turismo cu sigur nos por garantisa un desaroyo sostenibel pa futuro. “Pabien riba e dia aki y ban ta consciente di e importancia cu turismo tin pa cada un di nos.”
